सभापति शाक्ययात हाथ्या

येँ -नेपाली कांग्रेस येँ महानगर समिति दुने जुयाच्वंगु कचवं आः पिने सामाजिक सञ्जालय् छताछुल्ल जू वःगु दु । महानगर समितिया सभापति पदय् पराजित जूम्ह उम्मेदवार प्रगतिमान रञ्जितं सामाजिक सञ्जालय् हे छगू स्टाटस च्वसें महानगर समितिया सभापति निलकाजी शाक्ययात यकःति ढंगं पार्टी चले यायेत्यन धकाः द्वपं बियाहःगु दु ।

कांग्रेसया विधान कथं निर्वाचनय् पराजित जूम्ह उम्मेदवारयात समितिया स्वतः पदेन दुजः जुइमाःगु खःसां थःत समितिया बैठकय् तकं मसःतू धासें पार्टी दुने थःपिंत शेरबहादुर देउवा पक्षधर धकाः काखापाखा याःगु खँ धयादीगु दु । थ्व शैलीं पार्टी बांलाक न्ह्याइ मखु धासें रञ्जितं यदि थुगुसी मेयरया टिकट शाक्ययात हे दत धाःसा फुक्क मिले जुयाः बांलाःगु लिच्वः हयेमाःगु खः लाकि मखु धकाः नं न्ह्यसः तयादीगु दु । पासां पासापिनि ग्वाहालि मकासे चुनाव त्याकेगु घमण्ड यानाच्वंगु खः धकाः नं उकी द्वपं बियादीगु दु ।