किपू देय् विश्व सम्पदाया धलखय् !

आः किपू देय् नं विश्व सम्पदाया धलखय् ! खतुं किपू देय् विश्व सम्पदाया धलखय् दुथ्याःगु मदुनि । तर दुथ्याये फइगु सम्भावना दु। ऐतिहासिक नेवाः बस्ती पन्ति लिपा आः मेगु ऐतिहासिक नगरी किपू नं विश्व सम्पदाया धलखय् दुथ्याये फइगु खँ वयाच्वंगु दु। करिब २५ दँ ताःहाकःगु कुतः लिपा पन्ति विश्व सम्पदाया धलखय् सुचीकृत जुइगु लुखाय् थ्यनेधुंकूगु दु ।

आः वयाः येँ देय्या दक्षिणय् लाःगु  नेवाः जातिया बाहुल्यता दुगु ऐतिहासिक देय् किपू नं विश्व सम्पदा धलखय् सुचीकृत जुइ फइगु खँ धाःगु दु। नेवाः सभ्यता, कला, कौशल, रहनसहन, जात्रा, पर्व, संस्कृतिव समुदायया विशेषता आतक नं यथावत हे जुयाच्वंगुलिं किपू लागा विश्व सम्पदाया धलखय् सुचीकृत जुइ फइगु आधार दुगु छगू ज्याझ्वलय् धाःगु दु । सम्पदा संरक्षणय् न्ह्यचिलाच्वंगु युएन ह्याबिटाट व लुमन्ति आवासया निंतिं सहयोगी समूहपाखें थ्वहे वंगु पुस २० गते किपू नगरपालिका वडा नं. १० स्थित होटल हिलसाइडय् जूगु सम्पदा संरक्षणया योजना हस्तान्तरण ज्याझ्वलय् उगु खँ न्ह्यथंगु खः ।

ऐतिहासिक नगर किपूया सम्पदात  संरक्षणया निंतिं उगु संस्थातय्सं किपूया सम्पदात गुकथं संरक्षण व संवद्र्धन याये फइ धइगु विषयय् केन्द्रीत जुयाः अज्याःगु सम्पदाया ऐतिहासिक पक्ष व उकिया संरक्षणया निंतिं यायेमाःगु ज्याया विस्तृत अध्ययन यानाः छगू योजना तयार याःगु दु। वंगु पुस २० गते जूगु ज्याझ्वलय् उगु योजना मूपाहांकथं झायादीम्ह किपू नगरपालिकाया प्रमुख रमेश महर्जनयात लःल्हाःगु खः ।

युएन ह्याबिटाटया कार्यक्रम प्रबन्धक पद्मसुन्दर जोशीया सभापतित्वय् जूगु ज्याझ्वलय् नवासें किपू नगरपालिका प्रमुख महर्जनं किपूलिसें नेपाःया मेमेगु नं छुं छुं थाय् सन् २००८ य् विश्व सम्पदाया धलखय् सुचीकृत जुइगु निंतिं अस्थायी सुचीकृत जूगु जानकारी बियादिसें युएन ह्याबिटाट व लमुन्तिं तसकं मेहनत यानाः दयेकूगु योजना कार्यान्वयन याना यंकेगु नापं विश्व सम्पदाया धलखय् स्थायी रुपं हे सुचीकृत यायेगु निंतिं कुतः यायेगु विश्वास प्वंकादिल । नगरप्रमुख महर्जनं तसकं दुग्यंक मेहनत यानाः दयेकूगु सम्पदा संरक्षणया योजनाया निंतिं युएन हयाबिटाट व लुमतियात सुभाय् नं देछानादिल ।

लुमन्ति संस्थां किपू नगरपालिकाया अन्तर्गतया किपू डाँडा, पांगा, च्वबहाः लागाया बिस्कं बिस्कं अध्ययन याःगु खःसा अध्ययन लिपा तयार याःगु योजना सम्बन्धित वडाया वडाअध्यक्षयात नं लःल्हाःगु खः । थ्व ल्याखं किपू नगरपालिकाया वडा नं. १, २, ३, ५, ६, ८ व १० वडाअध्यक्षयात नं योजना लःल्हाःगु खः । अध्ययनया झ्वलय् तयार याःगु योजना लःल्हायेगुया नापं अध्ययनया सिलसिलाय् तयार याःगु प्रतिवेदन लुमन्तिया श्रृष्टिना श्रेष्ठं न्ह्यब्वयादीगु खः ।

ज्याझ्वलय् नेपाल सरकार, पुरातत्व विभागया विश्व सम्पदा संरक्षण शाखाया सुरेश सरश श्रेष्ठं किपूया सम्पदा प्रतिवेदनपाखें किपू विश्व सम्पदाया धलखय् सुचीकृत जुइ फइगु आधारत दुगु खँ न्ह्यथनादिसें सुचीकृत यायेगु निंतिं न्ह्यचिलेमाःगु खँय् बः बियादिल । विश्व सम्पदाया धलखय्दु थ्यायेगु धइगु पर्यटक दुकायेगु जक मखसे पूर्खापिंसं दयेका थकूगु महत्वपूर्ण सम्पदा, पहिचानया संरक्षण व संवद्र्धन नं यायेमाःगु खँय् बः बियादिल । ज्याझ्वलय् किपू नगरपालिकाया उपप्रमुख सरस्वति खड्का, थीथी वडाया वडाअध्यक्षपिं, किपूया सम्पदा अभियन्ता शुद्धरत्न महर्जन, लुमन्ति संस्थाया लुमन्ति जोशीं नं किपूयात विश्व सम्पदा धलखय् दुथ्याकेगु निंतिं यायेमाःगु थीथी पक्षयात कयाः नुगःखँ प्वंकादीगु खः ।

सम्बन्धित बुखँ

LEAVE YOUR COMMENTS