रामदेवया च्यानल दर्ता हे मजूनि

येँ -भारतया नांजाःम्ह योगगुरु बाबा रामदेवया संस्था पतंजलिपाखें नेपालय् सञ्चालन यायेगु धकाः तयारी यानाच्वंगु टेलिभिजन च्यानल आः तक नेपालय् दर्ता हे मजूनिगु खँ पिहां वःगु दु । थुकिया बारे नेपाःया सञ्चार माध्यमय् यक्व आलोचना पिहां वयेवं म्हिगः पतंजलि योगपीठपाखें छगू विज्ञप्ति पिकासें थःपिनिगु टीभी च्यानल आः तक नेपालय् दर्ता मजूनिगु व उकिया लागिं प्रक्रिया न्ह्यानाच्वंगु खँ स्वीकार याःगु खः ।

नेपाःया सञ्चार माध्यमतय्सं धाःसा नेपाःया कानून कथं सञ्चार माध्यमय् सुं नं विदेशी कम्पनीं लगानी याये मदइगु जूगुलिं रामदेवया थ्व कम्पनीं नं थन टीभी च्यानल सञ्चालन याये मफइगु खँ धाःगु दु । छुं दँ न्ह्यः नं नेपालय् ‘हिमालय टाइम्स’ पत्रिकाय् विदेशी लगानी दुगु खँ पिहां वयेवं उकियात कयाः यक्व आलोचना जूगु खः । आः नं सञ्चार माध्यमय् भारतया लगानी जुइके मजिउगु खँ पिहां वःगु दु ।

भारतया सत्तारुढ दल भाजपालिसे सतीम्ह धयातःम्ह बाबा रामदेवं चायेकेत्यंगु निगू टिभी च्यानलया उलेज्या समारोहय् नेपाःया प्रधानमन्त्री शेरबहादुर देउवा लिसें गठबन्धन दलया नेतात माधव नेपाल व पुष्पकमल दाहाल समेत हुल मुनाः वंगु खँय् नं थन यक्व आलोचना जुयाच्वंगु दु । सत्तारुढ दलया नेतातय्सं रामदेवयात याःगु सत्कारया लिउने राजनीतिक कारण समेत दयेमाः धकाः अनुमान याना हःगु दु ।