ने. सं. ११४४ कौलाथ्व षष्ठी -

येँ महानगरपालिका २३ वडाय् सार्वजनिक सुनुवाइ

येँ (नेपालभाषा टाइम्स)- येँ महानगरपालिका २३ वडाय् सार्वजनिक सुनुवाइ ज्याझ्वः जूगु दु । ज्याझ्वलय् वडाया अध्यक्ष मचाराजा महर्जनं चालु आर्थिक दँया वंगु खुला दुने वडापाखें जूगु थीथी ज्याझ्वः व वइगु खुला दुने यायेगु ज्याझ्वःया बारे प्रतिवेदन न्ह्यब्वयादीगु खः । ज्याझ्वलय् न्ववानादिसें वडाया स्थानीय समुदायया माग व चाहना कथं थःपिंसं ज्याझ्वः यानाच्वनागु खँ कनादिसें अध्यक्ष महर्जनं थःपिंसं थुगु आर्थिक दँ निसें विकास खर्चय् जक सामाजिक, आर्थिक क्षेत्रय् ज्या यायेगु निंतिं नं बजेट फ्यानागु खँ धयादिल ।

‘महानगरपाखें न्हापा वडाय् बजेट वइगु धयागु विकास निर्माणया निंतिं जक खः । गनं सतक दयेकेमाल, अप्पां सीमाल धाःसा बजेट फ्याइ, तर २३ वडाय् थौंकन्हय् अज्याः विकास निर्माणया ज्या यायेमाःगु मदयेधुंकल । दक्वथासय् आवश्यक कथं ल्वहतं सीगु, लँ दयेकेगु ज्या जुइधुंकल । अथे धकाः महानगरपाखें बजेट हे मकायेगु ला जुइमखु । उकिं वडावासीपिंत हे प्रत्यक्ष रुपं लबः दइकथं ज्याझ्वः न्ह्याकेगु निंतिं बजेटया व्यवस्था यानागु दु’ ज्याझ्वलय् न्ववानादिसें वडाअध्यक्ष महर्जनं धयादीगु दु ।

वय्कःया कथं थुगु आर्थिक दँ निसें वडाय् वइगु बजेट मध्ये विकास निर्माणया ज्याया निंतिं पूँजीगत बजेट ६० प्रतिशत व वडावासीतय् सामाजिक, आर्थिक, सांस्कृतिक विकासया निंतिं ४० प्रतिशत चालु बजेट फ्याःगु खः ।

चालु बजेटपाखें वडावासीपिंत प्रत्यक्ष लबः दइगु कथं आर्थिक उपार्जन जुइगु ज्या यायेफइकथं थीथी तालिम बीगु, वडा दुनेया अमूत सम्पदा बाजं, गुथिया संरक्षणया निंतिं खर्च यायेगु, स्वास्थ्य केन्द्र स्थापना यायेगु, विपद व्यवस्थापन आदि ज्याया निंतिं खर्च यायेगु व यानाच्वनागु खँ कनादिल । थुगु बजेट कथं थुगुसी वडापाखें २३ वडा दुने लाःगु च्यागू बाजं खलःयात म्हतिं न्यागू न्यागू लाख दां बीगु खँ धयादिल । अथेहे वडावासीतय् क्षमता विकासया निंतिं अन्तर्राष्ट्रिय बजार पहुँच सम्बन्धी तालिम बियागु, संघसंस्थातय्त सामाजिक विकास सम्बन्धी तालिम बियागु खँ कनादिल ।

अथेहे वडाय् च्वंगु सम्पदा संरक्षण व प्रचार प्रसारया निंतिं वडाय् दुगु फुक्क सम्पदाया डाटा संकलन यानाः, उकिया बारे जानकारीसहित वेब साइटय् तयेगु व क्यूआर कोड स्क्यान यानाः उगु सम्पदाया जानकारी कायेफइ कथं ज्या न्ह्याकाच्वनागु जानकारी बियादिल ।

अथेहे वडावासी मिस्तय्सं आर्थिक उपार्जन जुइकथं गाडी चले याये सयेकेमा धयागु ल्याखं मिस्तय्त गाडी चले यायेगु तालिम बीत्यनागु खँ नं वय्कलं कनादिल ।
मेगु दँय् नं वडावासीतय् सामाजिक आर्थिक विकासय् थप बजेट फ्यायेगु निंतिं वडाया वस्तुगत अवस्था सीकेगु निंतिं वडा प्रोफाइल तयार यानाच्वनागु खँ नं वय्कलं कनादिल । वडा प्राफाइल तयार यायेगु निंतिं वडाया स्वयंसेवकत छेँय् छेँय् वनाः डाटा संकलन यानाच्वंगु दु । ‘थुकिया प्रतिवेदन कथं वडाय् छु ज्या यायेगु आवश्यक जुइ उकिया विस्तृत अध्ययन यानाः उगु कथं बजेट फ्यायेगु जुइ’ वय्कलं धयादीगु दु ।

सुनवाइ ज्याझ्वलय् सहभागी वडावासीपिंसं सम्पदास्थलत सुचुपिचु यानातयेमाःगु, वडाया सौन्दर्यकरणं ध्यान बीमाःगु, शव वाहन तयेमाःगु, जःलाखःलापाखें जुइगु ध्वनि प्रदूषणपाखे ध्यान बीमाःगु बारे सुझाव बिउगु खः ।