तवः समाजया न्हापांगु तःमुँज्या व निक्वःगु दँंमुँज्या

येँ(नेपालभाषा टाइम्स)- उदाय समुदाय दुनेया छगू कवः तबः (ताम्राकार) समाजया न्हापांगु तःमुँज्या व निक्वःगु दँमुँज्या क्वचाःगु दु । समाजया नायः तेजरत्न ताम्राकारया सभापतित्वय् थनया जगतसुन्दर ब्वनेकुथिइ जूगु ज्याझ्वलय् मूपाहांकथं उदाय समाजया नायः डा. रुपज्योति कसाः झायादीगु खः ।

उदाय म्येँ हायेकाः मदुपिं ताम्राकार जःपिनि लुमन्तिइ छगू मिनेट मौन धारण यासें न्ह्याःगु ज्याझ्वलय् न्वकु उदयरत्न ताम्राकारं लसकुस यानादीगु खः । ज्याझ्वलय् मूछ्याञ्जे मंगलरत्न ताम्राकारं प्रगति प्रतिवदेन व दांभरिं पदम ताम्राकारं आर्थिक प्रतिवेदन न्ह्यब्वयादीगु खःसा तबः मिसा पुचःया छ्याञ्जे तारा ताम्राकारं पुचःया प्रगति विवरण ब्वनाः न्यंकादीगु खः ।

समाजपाखें पिथंगु प्रतिवेदन पौ उदाय समाजया नायः डा. रुपज्योति कसाः, तबः समाजया सल्लाहकार अमिररत्न ताम्राकार व नायः तेजरत्न ताम्राकारं मंकाःकथं उलेज्या यानादीगु खः ।

ज्याझ्वलय् एसइइ व प्लस टु तगिं उत्तीर्ण तबः समाजया विद्यार्थीपिंत हनेज्या नं याःगु खः । मूपाहां कसां हनापौ देछानादीगु ज्याझ्वलय् नायः ताम्राकारं खादा क्वखायेकादीगु खःसा दाता चक्रवीर ताम्राकारं नगद सिरपाः लःल्हानादीगु खः । तबः समाजयात च्वन्ह्याकेगु ज्याय् योगदान बियादीम्ह चक्रवीर ताम्राकारयात विशेष हनेज्या नं याःगु ज्याझ्वलय् मूपाहां कसाः, समाजया नायः ताम्राकार, मिसा पुचःया नायः प्रफुल्लकमल ताम्राकार लगायतं नुगःखँ तयादीगु खः ।

नायः ताम्राकारं थःगु नेतृत्वया ज्यासना पुचः भंग जूगु घोषणा यानादीवं न्हूगु ज्यासना पुचः ल्ययेगु प्रक्रिया न्ह्याःगु खः । तःमुँज्यां सूर्यरत्न ताम्राकारया अध्यक्षताय् न्हूगु ज्यासना पुचः ल्यःगु खः । न्हूगु ज्यासना पुचलय् प्रवेशमान ताम्राकार न्वकु, दिनेश ताम्राकार मूछ्याञ्जे, निरजमान ताम्राकार छ्याञ्जे, सरजु ताम्राकार दांभरिं पदय् निर्वाचित जुयादीगु दु । अथे हे दुजलय् शान्तमूनि ताम्राकार, अशोक ताम्राकार, ज्योतिरत्न ताम्राकार व मिसा दुजलय् सुनिता ताम्राकार निर्वाचित जुयादीगु दु ।

नांजाःम्ह समालोचक पूर्ण ताम्राकारया संयोजकत्वय् ईश्वरमान ताम्राकार व नरेशकाजी ताम्राकार दुथ्याःगु निर्वाचन कमिटीं न्हूगु ज्यासना पुचःया ल्यज्या याःगु खः ।