‘बलदेव जुजु नेवाः संस्कृतिया प्रगतिशील विचारक खः’

येँ- संस्कृतिविद् मदुम्ह बलदेव जुजुयात लुमंकुसें श्रद्धाञ्जली सभा जूगु दु । राजोपाध्याय समाजं नेपाली संस्कृति क्षेत्रय् संस्कृतिविद् कथं नांजाःम्ह समाजया सल्लाहकार व आजीवन दुजः जुजुयात लुमंकुसें श्रद्धाञ्जली सभा याःगु खः ।

सभाय् न्ववानादिसें अध्यापन क्षेत्रय् मदुम्ह जुजुया सहकर्मी नेपालभाषा शिक्षक राजा शाक्यं संस्कृति क्षेत्रया थीथी पक्षय् जुजु प्रगतिशील बिचारक जूगु खँ कनादिल । वय्कलं संस्कृतियात स्वइगु दृष्टि हे प्रगतीशल विचाराधाराया जूगु खँ शाक्यं कनादिल । गुलिसिनं जुजुया लेख, कृतियात कल्पना जक खः धायेगु याःसां थ्व हे कल्पनां अनुसन्धानया जग जुयाच्वंगु खँ नं भाजु शाक्यं धयादिल ।

अथेहे नेवाः देय् दबूया नायः नरेश ताम्रकारं नेवाः लिसें नेपाःया हे संस्कृतिया सुक्ष्म अध्ययन यायेगु खःसा व संस्कृतियात सुक्ष्म तह तह हे वनाः थुइकेगु खःसा जुजुया कृति व लेखत अध्ययन याये हे माःगु खँय् बः बियादिल । थः स्वनिगलं पिनें हुर्के जूम्ह जूगुलिं न्हापां स्वनिगःया नेवाः संस्कृति थुइकेमफुगु व जुजुया हे कृति व लेखकत ब्वनाः नेवाः संस्कृतिया मौलिकता व विशेषतालिसे साक्षात्कर जूगु खँ वय्कलं कनादिल ।

अथेहे नेपालभाषा मंकाः खलःया सचिव नरेशवीर शाक्यं समाजया प्रचलित संस्कृतियात दैनिक जीवनलिसे स्वानाः व्याख्या यासें संस्कृतियात स्वयेगु दृष्टिकोणय् हे बलदेव जुजुं हिउपाः हयाबिउगु बिचाः प्वंकादिल । नेवाः समाजय् बौद्धतय् वज्राचार्य व सनातीनतय् राजोपाध्याय गुरु पुरोहित कथं दयाच्वंगु चर्चा यानादिसें वय्कलं वज्राचार्यतय् दथुइ कमल न्ह्याःपिं यक्व व्यक्तित्व दुसां राजोपाध्यायय् पाखे धाःसा तसकं म्हो जक अध्ययन अनुसन्धान व लेखन क्षेत्रय् दुगु खँ न्ह्यथसें अज्याःपिं म्होचा लेखक मध्ये मदुम्ह जुजु जूगु व वय्कःया लेखन नं विशिष्ट शैलीया दुगु खँ कनादिल ।

राजोपाध्याय समाजया अध्यक्ष अमरराज शर्मा राजोपाध्यायं मदुम्ह जुजुं यक्वसित शिक्षा बियाः जीवनया सहि अर्थ थुइकेत सफल जूगु खँ कनादिल । वय्कःया हे शिक्षा व मार्गनिर्देशनय् यक्व हे अध्ययन अनुसन्धान क्षेत्रय् सफल जूगु उदाहरण वय्कलं कनादिल ।

मदुम्ह जुजुया परिचय बीगु झ्वलय् राजोपाध्याय समाजया उपाध्यक्ष संजय शर्मा राजोपाध्यायं वय्कः संस्कृतिविद जक मखु, संगीतविद् नं जूगु खँ न्ह्यथनादिल । थीथी राग, तालया ज्ञाता नं जूगु धासें जुजुयात संगीत ख्यलय् नं थीथी सम्मान बीधुंकूगु खँ कनादिल ।

ज्याझ्वलय् मदुम्ह जुजुयात स्वां देछाया उपस्थिति सकसितं श्रद्धाञ्जली बिउगु खः । वय्कः वंगु श्रावण ९ गते बुधवाः चान्हय् मदुगु खः । वय्कः अल्जाइमर डिजज पाखें ग्रसित जुयाच्वंम्ह खः । मदुम्ह जुजुया संस्कृति सम्बन्धी नेपाःया तान्त्रिक द्यः व तान्त्रिक पुजा, कान्तिपुर, येँ देय्या वंघःत्वाः व आजुद्यः, नेवाः संस्कार व उकिया विधि, मृत्यु संस्कार नेवाः संस्कृति कथं लगायत विश्लेषणात्मक पुस्तक पिदनाच्वंगु दु । वय्कः राजोपाध्याय समाजया सल्लाहकारया लिसें वैदिक प्रतिष्ठानया संस्थापक अध्यक्ष नं खः । लिसें वय्कः सरस्वती क्याम्पसया क्याम्पस प्रमुख नं जुइधुंकूम्ह खः ।