क्षमा पुजा यानाः यँयाः स्थगित

येँ- थनिंनिसें न्ह्याइगु येँयाः जात्रा कोरोना महामारीया कारणं मन्यायेकल । यँयाः जात्राया परम्परा कथं थौं सुथय् हनुमानध्वाखाय् यःसिं थनेमाःगु खः । तर थुगुसी यःसिं समेत मथनीगु जूगुलिं केन्द्रीय मानन्धर संघपाखें हनुमानध्वाखाया यःसिं थनीगु गालय् क्षमा पुजा यात । थुगुसी यःसिं थने मफुगु खँय् क्षमा फ्वँसें उगु पुजा याःगु खः ।

अथे हे म्हिगः पुलुकिसियात नं क्षमा पुजा याःगु खः । उकथं हे लाखे, होल्चोक आकाश भैरव (सवःद्यः) यात नं क्षमा पुजा यासें थुगुसी पिमकायेगु निर्णय जूगु खः । लाखे पिमकाःसां लाखे आजुया ख्वाःपाःयात आसनय् तयेगु ज्या जूगु खः । उकथं हे सवःद्यःयाथाय् नं सकलें द्यःगणया ख्वाःपाः पिकयाः पुजा याःगु खः ।

यँयाः जात्रा न्यायेकेगु ज्या मजूसां थौं द्वादशी कुन्हु छुं मनूत उपाकु वनेत धाःसा पिहां वःगु खने दत । द्वादशी कुन्हु उपाकु वनेगु चलन कथं छुं मनूत थौं सुथय् ४ बजे दनाः उपाकु वःगु खः । सुथय् प्रहरीं ज्वनी मखु धकाः उपिं सुथय् उपाकु वयाः ८ बजे जूबलय् सिधयेकाः लिहां वंगु खः । अथे हे थौं न्हिनय् नं छुं मनूत उपाकु वःगु खने दत । बाजंत धाःसा छथ्वः हे सहभागी जूगु खने मंत ।

यँयाः जात्राया छगू महत्वपूर्ण अंग जुयाच्वंगु श्री कुमारी, श्री गणेश व श्री भैरवया रथ सालेगु ज्या नं थुगुसी मयाइगु जूगु दु । यँयाः जात्रा येँदेयया दकलय् महत्वपूर्ण जात्रा मध्ये छगू खः । येँय् थुकियात तःजिक न्यायेकेगु याःसा यल, ख्वप, दोल्खाय् नं थःथःगु कथं यँयाः पर्व हनेगु याः ।

नेपाल संवत् ८८८ स तत्कालीन गोर्खाया जुजु पृथ्वीनारायण शाहं येँय् आक्रमण याःगु दँय् येँया जुजु जयप्रकाश मल्लं कुमारीया रथ जक सालाः मेमेगु जात्रा धाःसा स्थगित याःगु खः । थ्व धुंकाःलि वि.सं. २०६५ सालय् तत्कालीन गणतान्त्रिक सरकारं यँयाःबलय् पिहां वइपिं थीथी द्यःपिंत बलि बीगु बन्द यायेवं उकिया विरुद्ध आन्दोलन जूबलय् नानीचायाः भद्रगोल जूवंगु खः ।

सम्बन्धित बुखँ

LEAVE YOUR COMMENTS