किपू नपायात स्वास्थ्य सामग्री ग्वाहालि

किपू – किपू नगरपालिकायात चीनया छगू संस्थापाखें स्वास्थ्य सामग्री लःल्हाःगु दु । चीनया अ ड्रप अफ लाइफ नांया संस्थां किपू नगरपालिकायात आइसोलेसनया निंतिं आवश्यक स्वास्थ्य सामग्री लःल्हाःगु खः ।

चिनिया संस्थाया प्रतिनिधिं किपू नगरपालिका वडा नं. १०या वडाअध्यक्ष अमन महर्जनयात उगु स्वास्थ्य सामग्री लःल्हाःगु खः । चिनिया संस्थां न्यागः अक्सिजन सिलिन्डर, ह्यायण्ड स्यानिटाइजरलिसें मेमेगु आवश्यक स्वास्थ्य सामग्री लःल्हाःगु खः ।

किपू नगरपालिकां विश्वव्यापी रुपय् महामारी न्यना वनाच्वंगु कोरोना भाइरस (कोभिड १९)या संक्रमिततय्त लक्षित यानाः आइसोलेसन तयारी अवस्थाय् तयातःगु दु । किपू नगरपालिका वडा नं. १० कीर्तिपुर कभर्ड हलय् तत्कालया निंतिं १६ बेडया आइसोलेसन तयारी अवस्थाय् तयातःगु दु । चिनिया संस्थां उगु हे आइसोलेसनया निंतिं आवश्यक स्वास्थय सामग्री ग्वाहालिकथं लःल्हाःगु खः ।

उगु इलय् वडाअध्यक्ष महर्जनं किपू नगरपालिकापाखें स्वास्थ्य सामग्री ग्वाहालि याःगु चिनिया संस्थायात सुभाय् देछानादीगु खः । नेपालय् लिपांगु इलय् कोरोना संक्रमितया ल्याखय् म्होति वयाच्वंगु दुसा संक्रमित जूपिं नं आपालं मुक्त जुयाच्वंगु दु । संक्रमण मुक्त जूसां जोखिम धाःसा कायम हे दु । थज्याःगु अवस्थाय् संक्रमिततय्त तयेगु निंतिं किपू नगरपालिकां संक्रमिततया निंतिं आइसोलेसन तयारी अवस्थाय् तयातःगु खः ।

सम्बन्धित बुखँ

LEAVE YOUR COMMENTS