येँ फाेहर व्यवस्थापनय् समस्या

येँ- येँ महानगरय् फोहर व्यवस्थापन यायेत हाकनं समस्या सुरु जूगु दु । महानगरं फोहर वायेगु निंतिं अल्पकालिन व्यवस्था यानातःगु सिसडोल डम्पिङसाइट जायेवं फोहर वायेत हे समस्या जुयावःगु खः ।

येँ महानगरपालिका लिसें स्वनिगःया थीथी नगरपालिकां झिंस्वदँ न्ह्यव निसें फोहर वायेगु याना वयाच्वंगु नुवाकोटया सिसडोल व थुकिया लिक्क दयेकेगु मेगु निगू थाय् भ्याली वान व भ्याली टु नं फोहर जायेवं व्यवस्थापन यायेत समस्या जूगु खँ धाःगु दु ।

येँ महानगरपालिकाया वातावरण विभागया प्रमुख हरिकुमार श्रेष्ठं आः व्यवस्थापन यानाच्वनागु थाय् लिक्क लिक्क हे फोहर वायेत मेगु थाय् मालाच्वनागु खँ धयादीगु दु । तर थुकियात स्थानीयवासीतय्सं धाःसा अस्वीकार याना वयाच्वंगु सीदुगु दु ।

दीर्घकालिन रुपं फोहर वायेगु निंतिं दयेकाच्वंगु बञ्चरे डाँडाया ल्यान्डफिल साइडया ज्या पूवंक क्वमचाःगुलिं यानाः मनपायात हाकनं फोहर वायेत समस्या जूगु खः । बञ्चरे डाँडाया ल्यान्डफिल साइड दयेकेगु ज्या असारय् हे क्वचायेकेगु धयातःगु खःसा कोरोना महामारीया कारणं बांलाक ज्या याये मफुगुलिं समस्या वःगु खः।

प्रमुख श्रेष्ठया कथं आः न्हापा फोहर वानाच्वंथाय् हे चां ल्हानाः तत्कालया निंतिं व्यवस्थापन यायेगु वा स्थानीयवासीयात सहमति कयाः मेगु थाय् मालेगु बाहेक मेगु विकल्प मदुगु खँ धयादीगु दु ।