
येँ (नेपालभाषा टाइम्स)- संघीय संसद सचिवालयं सभामुखया निर्वाचनया तयारी पूवंकूगु दु । संसद सचिवालयया प्रवक्ता एकराम गिरीया कथं थौं सभामुखया निर्वाचन तालिका प्रकाशित जुइ । कन्हय् सभामुखया नितिं मनोनयन दर्ता याइगु ज्याझ्वः दु ।
कन्हय् हे संसद सचिवालयं सभामुखया उम्मेदवारया सूची तिकी । बिहीवाः ११ बजे सभामुखया नितिं निर्वाचन जुइ । प्रवक्ता गिरीया कथं निर्वाचन दस्तखत सहितया मत विभाजनपाखे जुइ । सभामुखया नितिं छम्हेस्यां जक मनोनयन दर्ता याकल धाःसा बिहीवाः प्रतिनिधिसभाया बैठकय् समर्थकं सम्बोधन यायेधुंकाः ज्येष्ठ दुजः पशुपति शम्शेर जबरां सभामुखय् निर्विरोध निर्वाचित जूगु घोषणा याइ ।
छम्ह स्वयां अप्वः उम्मेदवार दर्ता जुल धाःसा प्रस्तावकं प्रस्ताव न्ह्यब्वयेगु व समर्थकं समर्थन यायेगु ज्याझ्वः क्वचायेवं फुक्कं प्रस्तावयात कयाः संक्षिप्त सहलह जुइ । वयां लिपा ज्येष्ठ दुजलं सभामुखया उम्मेदवारीया प्रस्तावयात निर्णयार्थ न्ह्यब्वइ । प्रतिनिधिसभाया मुक्कं दुजःपाखें सुनां बहुमत हइ व हे सभामुख निर्वाचित जुइ ।
प्रतिनिधिसभाया न्हापांगु बैठक च्वंगु तिथिं झिंन्यान्हुया दुने सभामुख व उपसभामुखया निर्वाचन क्वचायेकेमाःगु संवैधानिक व्यवस्था दु । वंगु पुस २५ गते न्हापांगु बैठक च्वंगुलिं यानाः प्रतिनिधिसभां थ्वहे माघ १० गते दुने सभामुख व उपसभामुखया निर्वाचन यायेमाः । माघ ५ गते सभामुखया निर्वाचन जुइसा ७ गते उपसभामुखया निर्वाचन यायेगु तयारी सचिवालयं यानाच्वंगु दु ।
LEAVE YOUR COMMENTS