जबरजस्ती मचा लिकायेत स्वत्तलें

प्वाथय् दुम्ह मिसां मचा बुइकेत स्वइगु इलय् वयात प्रसव वेदना जुइ । गबलें गबलें मचा अःख च्वनाच्वंगु जुल कि नं मचा बुइकेत तसकं थाकुइ यः । तर सामान्य अवस्थाय् नं मचा बुइकेत चिकित्सकतय्सं याइगु जबरजस्तीया घटनां गबलें गबलें तःधंगु हे दुर्घटना जुइयः धइगु छगू उदाहरण खः भारतया जैसलमेरया घटना ।

प्वाथय् दुम्ह मिसायात तसकं प्रसव पीडा जुइवं चिकित्सकतय्सं वयागु पीडा म्हो यायेत जबरजस्ती मचायात पिकायेत स्वःगु इलय् तःधंगु हे दुर्घटना जुल । मचाया छ्यं चबुनाः मिसाया प्वाथय् हे लानाच्वनसा म्हया मेगु ब्व धाःसा पिहां वःगु खः । चिकित्सकतय्सं जबरजस्तीं मचायात साःगु इलय् मचाया छ्यं चबुना प्वाथय् दुहा हे लाःगु खःसा म्हया मेगु ब्व धाःसा कुचा दलाः पिहां वःगु खः ।

चिकित्सकतय्सं मिसा व वया छेँजःपिंत छुं नं जानकारी मबिसे घटनायात गुपचुप यायेगु ल्याखं उम्ह मिसायात जोधपुरया छगू अस्पतालय् रिफर यायेवं घटना पिहां वःगु खः । घटना जैसलमेरया राजगढया छगू सरकारी अस्पताय् जूगु खः । घटनाकथं दीक्षा कंवर नांया मिसायात प्रसव वेदना जुइवं न्हापां वयात रामगढया सरकारी अस्पताल यंकूगु खः ।

अन चिकित्सकतय्सं दीक्षयात प्रसव पीडा जुइवं मचाया तुति थपाय्सकं साल कि वयात म्ह निकू कुचा दला बिल । मचाया निपां तुति पिहां वयेवं वयात सालाकाःगु खः । अस्पतालया चिकित्सक डा. निखिल शर्माया कथं मचा न्हापा हे सीधुंकूगु खः । अस्पतालय् पुरा सुविधा मुगुलिं वयात जैसलमेर रिफर याःगु खः ।

जबरजस्ती मचाया तुति ज्वनाः सालाकाःगु इलय् वयात छ्यं चबुनाः दुने हे थाःगु खःसा उकिया जानकारी धाःसा सुयातं मबिसे तयातःगु खः । जैसलमेरया अस्पतालाया चिकित्सक डा. रविन्द्र सांखलां मचाया डेलिभिरि जूगु तर गर्भनाल वा प्लेसेन्टा मिसाया प्वाथय् हे त्वःफिउग खः धकाः धाःगु दु ।

चान्हसिया १ बजेनिसें मचाया गर्भनाल लिकायेगु कुतः जूसां सफल मजुइवं सुथ हाकनं कुतः याःगु खः । अय्सां सफल मजुइवं मिसायात हाकनं जोधपुरया अस्पताल रिफर यानाः छुटेजूगु छ्यं लिकाःगु खः । जोधपुरया जवाहर अस्पतालया मिसा ल्वय् विशेषज्ञ डा. उषा दुग्गदं थःगु जीवनय् थज्याःगु घटना गबलें मजूनिगु खँ धाःगु दु ।

थुलि तःधंगु घटना जुलं नं मिसाया छेँजःपिंत छुं नं जानकारी मबिउगु तसकं दुःखद् जूगु धासें छ्यं लिकायेवं मिसाया छेँजःपिं मचाया उगु छ्यं ज्वनाः प्रहरी ज्याकुथिइ वंगु खःसा प्रहरी थ्व घटनायात कयाः चिकित्सकयात न्यनेकने यायेवं जक सार्वजनिक जूगु खः । प्रहरीं थ्व सम्बन्धय् मुद्दा दर्ता यानाः अनुसन्धान यानाच्वंगु दु ।

 

सम्बन्धित बुखँ

LEAVE YOUR COMMENTS