देय् दबूया नेतृत्वया निंतिं मतदान क्वचाल, पवित्र व माइलाया धेंधेंबल्लाः
उदेन न्हूसाय्मिपाखें
धरान-थन न्ह्यानाच्वंगु नेवाः देय् दबूया न्हय्क्वःगु तःमुँज्याय् सर्वसम्मत नेतृत्व ल्ययेगु कुतः विफल जूगु दु । दबूया न्हूम्ह नायः ल्ययेगु लागिं मंगलवाः जूगु मतदान क्वचाःगु दु । अाः मतगणना यायेगु तयारी जुयाच्वंगु दु । नेतृत्वया निंतिं पवित्र वज्राचार्य व माइलाबाबु द्यःलाया दथुइ प्रतिस्पर्धा जूगु दु ।
नायः पदय् वज्राचार्य व द्यःला नापं चितवनया चन्द्रलाल राजभण्डारीं उम्मेदवारी बीगु खँ जूगु खःसां लिपा सहलह जूबलय् राजभण्डारी वरिष्ठ उपाध्यक्ष जुइत सहमत 
जूगु खःसां द्यःलां चुनावय् हे वनेगु अडान काःगु खः ।
चन्द्रलाल राजभण्डारी वरिष्ठ उपाध्यक्ष जुइत सहमत जुइवं तनहुँया शंकरनारायण श्रेष्ठं नं वरिष्ठ उपाध्यक्ष दावी यायेवं थ्व पदय् नं चुनाव जूगु खः ।
अथे खःसां बागमति प्रदेशया उपाध्यक्षय् शान्त श्रेष्ठ, स्वनिगः विशेषया उपाध्यक्षय् उमेश स्थापित, मधेश प्रदेशया उपाध्यक्षय् घनश्याम श्रेष्ठ, सुदुर पश्चिमया उपाध्यक्षय् विकास श्रेष्ठ व कर्णाली प्रदेशया उपाध्यक्षय् खगेन्द्र श्रेष्ठ धाःसा निर्विरोध जूगु दु । अथे हे महासचिव पदय् सत्यनारायण डंगोल व कोषाध्यक्ष पदय् निरञ्जनरत्न शाक्य नं निर्विरोध जुयादीगु दु । जातीय संस्थाया सचिव पदय् मचाराजा महर्जन निर्विरोध जुयादीगु दु ।
केन्द्रीय समितिइ मिसापिंपाखें ९ म्ह निर्वाचित जुइमाःगुली ७ म्हेसिगु जक उम्मेदवारी लाःगुलिं ७ म्हं निर्विरोध जूगु घोषणा जूगु दु ।
मिसा उपाध्यक्ष पदय् धाःसा रश्मिला प्रजापति, लक्ष्मी शाक्य व सीता श्रेष्ठं उम्मेदवारी बिउगु दु । म्हिगः लक्ष्मी शाक्यं विधान विपरित छगू प्यानल दयेकाः प्रचार याःगु खँय् विवाद जूगु व उकी रश्मिला प्रजापतिं उजुरी दर्ता यानाः शाक्यया उम्मेदवारीइ हे खारेज यायेमाः धकाः माग समेत यानादीगु खः।
प्रदेश नं. १, लुम्बनी व गण्डकी प्रदेशया उपाध्यक्ष पदय् चुनाव जूगु दु । उपमहासचिवय् न्हुछेकाजी महर्जन व राजेन्द्र कुमार श्रेष्ठ ल्वाःगु दु ।
न्हूगु विधान कथं नेवाः देय् दबूया कार्यसमिति ४५ सदस्यीय जुइ । कार्यसमितिइ नायः व वरिष्ठ उपाध्यक्ष छम्ह छम्ह दइसा थ्व बाहेक उपाध्यक्ष ८ म्ह दइसा महासचिव छम्ह, उपमहासचिव छम्ह, कोषाध्यक्ष छम्ह व सचिव प्यम्ह दइ ।
६० जिल्लाया प्रतिनिधि
न्हूगु नेतृत्व ल्ययेत चुनाव हे याइगु जुसेंलि मतदातात म्हिगः ५.३०निसें हे लाइन च्वंगु खः । तर मतदान धाःसा ७.३० तक नं मजूनि । थ्व चुनावय् मतदान याइपिं करिब ४०० म्ह मतदाता दु । थ्व तःमुँज्याय् देय्न्यंकंया ६० गू जिल्लां वःपिं करिब ७०० म्ह दुजःतय्सं ब्वति कयाच्वंगु दु । म्हिगः मतदान जूसा चान्हय् हे मतगणना यानाः थौं तक लिच्वः पिकायेगु ग्वसाः जुयाच्वंगु दु ।
चुनावय् सहभागी जूपिं उम्मेदवारत म्हिगः अतिकं उत्साहपूर्वक थःथःगु किपा दुगु कार्ड दयेकाः प्रचार यानाच्वंगु खः । उम्मेदवार जूपिं सकलें थःथःगु किपा दुगु बार्ड गःपतय् यखानाः थःत मत बीगु लागिं प्रचार याना जूगु खः । गुलिस्यां पर्चा पिकयाः नं भोट फ्वनेगु ज्या यानाच्वंगु खः । सर्वसम्मत यायेगु कुतः न्ह्यानाच्वंगुलिं मतदान लिबाःगु खँ धाःगु दु ।
LEAVE YOUR COMMENTS