इतुंबहालय् प्रव्रज्याभिषेक

येँ(नेपालभाषा टाइम्स)- थनया इतुंबहालय् बहाःया कुलपुत्रपिंत प्रव्रज्याभिषेक (वन्दे छुइगु) या निंतिं दुस्वः पुजा जुल । श्री केशचन्द्रकृत पारावत महाविहार इतुंबहाःया कुलपुत्रपिंत प्रव्रज्याभिषेक यायेत वंगु बुधवाः दुस्वः पुजा याःगु खः ।

दुस्वः पुजाया इलय् प्रव्रज्याभिषेक याइपिंत सकसितं विहारया लुखाय् तयाः वज्रयानी विधिकथं पुजा यानाः, सिफलं लुनाः लसकुस यासे दुचायेकूगु खः । अनंलि विहार परिक्रमा याकाः सकसितं धलं दंकाः कलाषाभिषेक बिउगु खः ।

विहारया मू थाय्पा मणिरत्न शाक्यपाखें प्रव्रज्याभिषेक याइपिंत आंग्साय् लुँ घाकाबिज्याःगु खःसा दुस्वः पुजाया हे झ्वलय् आगमय् , दिगुद्यःयाथाय् लिसें थाय्थासय् पुजा याःगु खः । उगु इलय् चक्रेश्वर ओमरत्न वज्राचार्यं, न्हुछेरत्न वज्राचार्यं माःकथंया पुजा विधि न्ह्याकादीगु खःसा सुरेश वज्राचार्यं वज्रयानी परम्पराकथं पंचशील बियादीगु खः ।

मू थाय्पा मणिरत्न शाक्य, सुवर्णमान शाक्य जजमान जुयाबिज्याःगु दुस्वः पुजाय् थाय्पापिं मोतिकाजी शाक्य, अमीर शाक्य, बोधवीर शाक्य, रविबहादुर शाक्य, सानुबाबु शाक्य, तेजरत्न शाक्य, विजेन्द्र शाक्यपिनिगु नं उपस्थिति दुगु खः ।

प्रव्रज्याभिषेक याये स्वयां न्ह्यः सकलें कुलपुत्रपिं मुनाः गुरुजु, मूथाय्पा, थाय्पापिंत किसलिं छायेगु ज्या जूगु खः । महाविहारया मुक्कं पीम्ह कुलपुत्रपिनि प्रव्रज्याभिषेक याःगु खः ।

सम्बन्धित बुखँ

LEAVE YOUR COMMENTS