एनपीपीएपाखें ल्याय्म्हतय्त उत्प्रेरणा ज्याझ्वः

येँ (नेपालभाषा टाइम्स)- नेपाः पासा पुचः अमेरिकाय् (एनपीपीए) पाखें खुक्वःगु युथ नेटवर्किङ एण्ड मोटिभेसनल नांगु उत्प्रेरणा ज्याझ्वः यात । भर्जिनियाया सिटी अफ फेरफ्याक्स लाइब्रेरी हलय् उगु ज्याझ्वः याःगु खः । अमेरिकाय् च्वंपिं नेवाः विद्यार्थीतय्त भविष्यय् छु विषय अध्ययन याःसा बांलाइ धकाः विषयगत सल्लाह बीगु तातुनाः एनपीपीएपाखें दँय्दसं थुकथंया ज्याझ्वः याना वयाच्वंगु दु ।

एनपीपीएया नायः मनोहर श्रेष्ठं सकसितं लसकुस यासें शुरु जूगु उगु ज्याझ्वलय् अमेरिकाया यु.एस. कार्बोन साइकल साइन्स कार्यक्रमया प्रमुख डा. ज्ञानी श्रेष्ठ, अंकोलोष्टि डा. यशस्वी श्रेष्ठ, अध्यागम कानुनी सल्लाहकार मय्जु बन्दिता शर्मा–दाहाल, कानुन व्यवसायी मय्जु कृटिष्मा श्रेष्ठ व डिजिटल मार्केटिङ एशोसियनया भीसीयु मय्जु निभा सैंजुपिंसं थःथःगु क्षेत्रया विशेषता व महत्व बारे ध्वाथुइकादीगु खः ।

ज्याझ्वलय् सहभागीपिंसं वय्कःपिंलिसे थःपिनि जिज्ञासा न्ह्यब्वयाः न्ह्यसःलिसः नं यानादीगु खः । ज्याझ्वलय् एनपीपीया पुलांपिं पदाधिकारीपिं लिसें थीथी विज्ञतय्गु नं सहभागिता दुगु खः । एनपीपीएपाखें दछियंकं थीथी कथंया ज्याझ्वःत याना वयाच्वंगु दु । थ्वहे झ्वलय् थ्वहे वइगु मार्च ३० तारिख कुन्हु हलिं नेवाः दिवस हनेत्यंगु दु ।

सम्बन्धित बुखँ

LEAVE YOUR COMMENTS