सोभियत संघया अन्तिम नेता मिखाइल गोर्बाचोभ मंत

एजेन्सी- सोभियत संघया अन्तिम नेता मिखाइल गोर्बाचोभ ९१ दँया वैंशय् मंत । सन् १९८५ निसें १९९१ तक तत्कालीन सोभियत संघया नेतृत्व याःम्ह मिखाइल गोर्बाचोभं अमेरिकालिसे जुयाच्वंगु शीतयुद्धया अन्त यायेत तःधंगु भूमिका म्हितूगु खः, तर गोर्बाचोभं सोभियत युनियनयात विघटन जुइपाखें धाःसा बचे यायेमफुत । सोभियत संघया विघटनलिपा आधुनिक रुसया उदय जूगु खः । पश्चिमा देय्लिसे सम्बन्ध सुधार याःगुलिं गोर्बाचोभयात सन् १९९१ य् नोबेल शान्ति पुरस्कार नं बिउगु खः ।

गोर्बाचोभं निगू मू मू सुधार यासें सोभियत संघया भविष्यय् हिउपा हःगु खः । गोर्बाचोभं ग्लासनोस्ट नीति अथे धयागु अभिव्यक्ति स्वतन्त्रता व पेरेस्त्रोइ नीति अर्थात पुनर्संरचना नीति हःगु खः । थ्वलिसें सोभियत संघया जनतायाके सरकारया आलोचना यायेदइगु अधिकार वःगु खः । गोर्भाचोभ स्वयां न्ह्यः थथे सरकारया आलोचना याये मदुगु खः ।

गोर्बाचोभ मदुगुलिं विश्वन्यंकंया नेतातय्सं समवेदना प्वंकूगु दु । रुसया राष्ट्रपति भ्लादिमिर पुटिनं गोर्बाचोभ मदुगुलिं दुःख व्यक्त याःगु खँ प्रवक्ता दिमित्रो पेस्कोभं धाःगु दु ।

संयुक्त राष्ट्र संघया प्रमुख एन्टोनियो गुटेरेसं गोर्बाचोभयात इतिहास परिवर्तन याःम्ह नेता धाःगु दु । बेलायतया प्रधानमन्त्री बोरिस जोनसोनं गोर्बाचोभया साहस व इमानया प्रशंसक जूगु धाःगु दु । अमेरिकाया राष्ट्रपति जो बाइडेन नं गोर्बाचोभ मदुगुलिं दुःख व्यक्त यासें गोर्बाचोभ विश्वया छम्ह दुर्लभ नेता खः धाःगु दु ।

सम्बन्धित बुखँ

LEAVE YOUR COMMENTS