आयल निगम ताथ जुइगु लँपुइ
येँ – भारतीय आयल कर्पोरेसनं पेट्रोलियम पदार्थया न्हूगु भाः छ्वया हयेवं नेपालय् हानं पेट्रोलया भाः थहां वनीगु सम्भावना ब्वलंगु दु । म्हिगः भारतीय आयल कर्पोरेसनं अझ अप्वः भाः तयाः पेट्रोलियम पदार्थया न्हूगु भाः छ्वया हयेवं नेपाल आयल निगमया सहप्रवक्ता पुष्कर कार्कीं छगू विज्ञप्ति पिकासें उकिया जानकारी बिउगु खः ।
म्हिगः भारतीय आयल कर्पोरेसनं छ्वयाहःगु भाः कथं पेट्रोल प्रतिलिटर १६.३७ पैसा, डिजेल २४.४९ पैसा व हवाई इन्धनय् १८.८९ पैसा भाः थहां वनाच्वंगु दु । न्हू छ्वयाहःगु भाः कथं निगमयात बाःछिया दुने ५ अर्ब ३० करोड तक घाटा जुइगु जूगु दुसा लछिया दुने १० अर्ब स्वयां अप्वः घाटा जुइगु खँ धयातःगु दु ।
निगमया कथं आः पेट्रोलियम पदार्थ ३२.८१ पैसा व डिजलय् ३६.४४ तका घाटा दु । मचिकं व हवाई इन्धनय् धाःसा निगमयात लबः हे जुयाच्वंगु खँ नं विज्ञप्तिइ न्ह्यथनातःगु दु ।
निगमं पित बिउगु विज्ञप्ति कथं चालु आर्थिक दँ २०७८÷७९ तक २८ अर्ब स्वयां अप्वः घाटा जुइधुंकूगु दु । उकथं हे निगमया सञ्चित ध्यबा व मेगु दायित्वया ध्यबा फुक्कं पेट्रोलियम पदार्थ न्यायेगुली फुइधुंकाः नेपाल सरकार मातहत दुगु मूल्य स्थिरीकरण कोष व पेट्रोलियम पदार्थ मियाः वःगु ध्यबा भारतीय आयल निगमयात पुलेधुनागु व आः वयाः निगमयात पेट्रोलियम पदार्थ न्यायेत तकं समस्या जुया वइगु खनेदुगुलिं न्हिंन्हिंया आपूर्ति व्यवस्था सहज याना तयेत तकं निगमयात थाकुइगु खँ नं धाःगु दु ।
निगमं पित बिउगु विज्ञप्तिइ आः हानं पेट्रोलियम पदार्थया भाः थकायेगु बारे धाःसा छुं नं कथंया खँ न्ह्यथनातःगु मदु ।
LEAVE YOUR COMMENTS