सेवा शुल्क खारेज विरुद्ध मजदूरतय् धम्की

येँ – रेष्टुरेन्ट एण्ड बार एशोसियसन नेपाल (रेवानं) सेवा शुल्क खारेज यायेवं मजदूरत व व्यवसायीतय् दथुइ विवाद तच्वया वःगु दु । विवादया झ्वलय् मजदूर संघं रेष्टुरेन्ट संचालकतय्त धम्की सहित पौ छ्वयेगु सुरु याःगु दु । अखिल नेपाल होटल, क्यासिनो तथा रेष्टुराँ मजदूर संघं रेवानं याःगु निर्णय प्रति रेष्टुराँया आधिकारिक धारणा २४ घन्टा दुने प्रष्ट यायेमाः धकाः धम्की सहित रेष्टुरेन्ट संचालकतय्त पौ छ्वःगु खः । उगु पतिइ रेवानया धारणाय् हे रेष्टुराँ संचालकया नं सहमति दुगु खःसा प्रतिकारय् कुहां वयेगु ख्याच्वः नं बियातःगु दु ।

स्वनिगलय् संचालन जुयाच्वंगु फुक्क धयाथें रेष्टुरेन्टय् अज्याः धम्की सहितया पौ छ्वयाहःगु खँ रेष्टुरेन्ट संंचालकतय्सं धाःगु दु । रेष्टुरेन्ट दुने च्वंगु मजदूर युनियनया हे शाखापाखें थज्याःगु पौ छ्वयाहःगु खः । होटल मजदूरतय्सं रेवानं याःगु निर्णयया विरोध यासें बुधवाः दरवारमार्गय् रेवानया विज्ञप्ती नं च्याका बिउगु खः । मेखे रेवानं धाःसा मजदूर संघया ख्याच्वः वःसां थःपिनिगु निर्णय लित मकायेगु धाःगु दु । उपभोक्तायात दंगु भावं सेवा बिइगु निंतिं यानागु निर्णय लित कायेमफइगु खँ रेवानं धाःगु दु ।

रेवानया महासचिव अरनिको राजभण्डारीं मजदूरतय्त न्यूनतम तलब व सामाजिक सुरक्षा बीत तयार दु, तर थःपिनि निर्णय लित कायेफइमखु धासें धयादीगु दु, ‘जिपिं मजदूरतय्त लय्तायेकेगु लिसें आम उपभोक्तायात नं लय्तायेके चाहे जुया । उपभोक्ता लय्ताल धाःसा अथें हे टिप्स बीगु याइ । टिप्स प्रवृत्तियात प्रोत्साहन बीगु ज्या यायेगु जुइ ।’