पेट्रोलया भाः थहां वनाः निगम घाटाय्

येँ – अन्तर्राष्ट्रिय स्तरय् पेट्रोलियम पदार्थया भाः थहां वनेवं नेपाल आयल निगमं लँय् छगू अर्बं मल्याक घाटा फयेमालाच्वंगु खँ धाःगु दु । निगमं पेट्रोलियम पदार्थय् लय् छगू अर्ब २९ करोड दां घाटा जुयाच्वंगु तथ्यांक सार्वजनिक याःगु दु । निगमया निमित्त कार्यकारी निर्देशक सुशील भट्टराई नं अन्तर्राष्ट्रिय बजारय् हे पेट्रोलया भाः थहां वंगुलिं निगमं घाटा फयेमालाच्वंगु खः ।

वय्कःया कथं भारतीय आयल कर्पाेरशनं मंगलवाः छ्वयाहःगु लिपांगु भाः कथं जक हे वंगु झिंन्यान्हुया दुने ६४ करोड ५७ लाख तका घाटा जूवंगु दु । थौंकन्हय् पेट्रोलय् प्रति लिटर ५।४५ तका, डिजेलय् ४।४३ तका, एलपिजी ग्यासय् छगः सिलिन्डरय् ४०४ तका ७३ पैसा घाटा दु । निगमं अन्तर्राष्ट्रिय भाः नाप समायोजन यायेगु निंतिं छुं न्हि न्ह्यव स्वक्वलं मल्याक इन्धनया भाः थकायेधुंकूगु दु ।