निःशुल्क भिसा व हवाइ टिकट व्यवस्था पुनरावलोकन यायेमाःगु सुझाव

येँ – श्रम मन्त्रालयया अधिकारीतय्सं वैदेशिक रोजगारीइ वनीपिं ज्यामितय् हितया निंतिं धकाः हःगु निःशुल्क भिसा व हवाइ टिकट सम्बन्धी व्यवस्थायात पुनरावलोकन यायेफइगु खँ धाःगु दु ।

यक्वः पारिश्रमिक दइगु विदेशी कम्पनीइ ज्या मिले यानाबीपिं म्यानपावर कम्पनीतय्त आः कायेखनाच्वंगु झिद्वः ध्यबाया कमिशन अप्वयेकत फत धाःसा रेमिटेन्टसय् तकं अप्वः दुहां वइगु खँ नेपाल राष्ट्र बंैकं याःगु छगू अध्ययनय् न्ह्यथनातःगु दु । उगु अध्ययन हे आः निःशुल्क भिसाया नीतियात पुनरावलोकन यायेत सुझाव बिउगु खः ।

थांैकन्हय् निःशुल्क भिसा व हवाइ टिकट व्यवस्था कथं ज्या मिले यानाबिउगु कम्पनीं झिद्वः तका जक कायेदइगु खःसां कम्पनीतय्सं थीथी बहानाय् यक्व ध्यबा कया वयाच्वंगु दु । उकिं यक्व पारिश्रमिक वइगु कम्पनीइ ज्या मिले यानाबिउगु म्यानपावर कम्पनीयात बीगु शुल्क अप्वयेकूसां जिउगु व थुकिं विदेशं वइगु रेमिट्यान्स अप्वयेकेत ग्वाहालि वइगु खँ प्रतिवेदनय् न्ह्यथनातःगु खः

राष्ट्र बैंक अनुसन्धान विभागया कार्यकारि निर्देशक नरबहादुर थापां बिबिसीलिसे खँ ल्हासें धाःगु दु, ‘यक्व पारिश्रमिक बीगु कम्पनी मालेत म्यानपावर कम्पनीं यक्व खर्च याःसां झिद्वः दां जक शुल्क कायेदइगुलिं म्यानपावर कम्पनी थज्याःगु रोजगारदाता कम्पनी मालेत उत्साहित जुइमखु ।’

वय्कलं धयादीगु दु, ‘गज्याःगु माग वइ, अथे हे छ्वयेगु खःसा मेगु हे खँ जुल । तर श्रमिकयात वइगु पारिश्रमिक कथं न्यूनतम शुल्क कायेदइगु प्रावधान तल धाःसा वैदेशिक रोजगार व्यवसायीतय्सं अप्वः तलब बीगु विदेशी कम्पनी मालेत स्वइ । उकिं म्यानपावर कम्पनीयात बीगु शुल्कय् पुनरावलोकन जुइमाः ।’
उगु प्रतिवेदनय् निःशुल्क भिसा व टिकटया प्रावधान लागू जूगु न्हय्गू देशय् वनीपिं ज्यामित थ्यंमथ्यं ९५ प्रतिशत दुगु खँ नं न्ह्यथनातःगु दु ।

श्रम, रोजगार तथा सामाजिक सुरक्षा मन्त्रालयया सचिव महेशप्रसाद दाहालं निःशुल्क भिसा व टिकट व्यवस्थां नेपालीतय्सं कायेखनीगु पारिश्रमिकय् लिच्वः लाकीगु धयागु खँ थुइकेफत धाःसा थुकियात पुनरावलोकन यायेगु बारे बिचाः यायेफइगु खँ धयादीगु दु ।
वय्कलं धयादीगु दु, ‘यदि म्यानपावर एजेन्सीतय्सं थज्याःगु महसुस यानाच्वंगु खः धयागु जूसा थ्व हे आधारय् नीति पुनरावलोकन यायेफइ । तर आःतक थ्व बारे छुं ज्या धाःसा न्ह्याःगु मदुनि ।’

तर म्यानपावरतय्त यक्व शुल्क पुलेमालीगु ज्यां ज्यामितय्त भारत अप्वयेकीगु धासें वैदेशिक रोजगार क्षेत्रया विज्ञतय्सं धाःसा छुं नं कथं शुल्क अप्वयेकेमजिउगु खँ धाःगु दु ।