भुटानलिसे नं व्यापार घाटा
येँ – नेपाःया व्यापार घाटा दँय्दसं तच्वया वनाच्वंगु दु । थ्व व्यापार घाटा तच्वया वनाच्वंगु भारत व चीन थेंज्याःगु तःधंगु देशपाखे जक मखु, भूटान थेंज्याःगु चीधंगु देशय् तकं जुयाच्वंगु दु । भूटान नेपाः स्वयां चीधंगु देय् खः । भूगोल, जनसंख्या, यातायात पूर्वाधार फुक्क ल्याखं भूटान नेपाः स्वयां लिउने लाः, अथे खःसां नेपालं भूटान पाखें हे व्यापार घाटा फयेमालाच्वंगु दु ।
वंगु आर्थिक दँय् नेपालं भूटानय् मुक्कं १३ करोडया सामान निर्यात जुलसा भूटानं थ्व स्वयां च्यागू गुणा अप्वm थ्यंमथ्यं छगू अर्ब ५५ करोड तकाया सामान आयात जुल । थ्व ल्याखं वंगु आर्थिक दँय् जक भूटान लिसे नेपाःया व्यापार घाटा छगू अर्ब ४२ करोडया व्यापार घाटा जूगु दु । थ्वयां न्ह्यवया आर्थिक दँ २०७४÷७५ य् नं भूटानं छगू अर्ब ९ करोडया सामान आयात जुलसा नेपाः पाखें मुक्कं प्यंगू करोडया सामान उखे निर्यात जूगु खः ।
भूटानं नेपाः वइगु सामानय् निर्माण सामग्री दयेकीगु कच्चा पदार्थ यक्व लाः । सिमेन्ट उद्योगय् आवश्यक जुइगु कच्चा पदार्थ, कोइलाया लिसें थीथी पेय पदार्थ, विद्युतीय उपकरण भूटानं नेपाः वयेगु यानाच्वंगु दु । उलि जक कृषि प्रधान धाइगु नेपालय् भूटानं आलु तकं वयेगु याः । तर नेपाःपाखें धाःसा भूटानय् छुं नं कृषिजन्य सामान निर्यात जुइमखु ।
वंगु आर्थिक दँय् जक भूटान लिसे नेपाःया व्यापार घाटा छगू अर्ब ४२ करोडया व्यापार घाटा जूगु दु ।
नेपालं भुटानय् साब्वं, चीज बल्स, लाकांया लिसें हस्तकलाया सामान जक निर्यात यायेफयाच्वंगु दु । थ्व हे दथुइ छुं ई न्ह्यव नेपाः व भुटान दथुइ व्यापार वार्ता जूगु दु । च्यादँ लिपा भूटान लिसे व्यापार वार्ता जूगु खः । थ्वयां न्ह्यः सन् २०१० व २०११ य् यानाः निक्वः जक भुटान लिसे थज्याःगु व्यापार वार्ता जूगु खः ।
भूटान लिसे आः जूगु स्वक्वःगु व्यापार वार्ताय् व्यापारया निंतिं थीथी सम्झौता यायेगु लँपु चाःगु खँ धाःगु दु । वाणिज्य तथा आपूर्ति मन्त्रालयया सहसचिव नवराज ढकालं बिबिसी लिसे खँ ल्हासें धयादीगु दु, ‘ताःई न्ह्यव निसें गथः थें जुयाच्वंगु भूटानलिसेया व्यापार वार्ता आः गथः फ्यनेगु कुतः जक जिमिसं यानागु दु ।’
वय्कःया कथं वइगु डिसेम्बरय् जुइगु मेगु वार्ताय् आयात व निर्यातया ज्वलंया धलः दयेकेगु व अज्याःगु ज्वलनं नेपाः व भुटानय् भन्सार शुक्ल मिनाहा यायेगु वा छुट बीगु धयागु विषयय् निर्णय जुइ ।भुटान व नेपाः दथुइ द्विपक्षीय व्यापार सम्झौताया मस्यौदा ‘ट्रेड एग्रीमेन्ट ड्राफ्ट फ्रेमवर्क’य् प्राविधिक रुपं सहमति जूगु वय्कलं कनादिल ।
वय्कलं व्यापार सम्झौताया निंतिं छगू मस्यौदा नेपाः व भुटानयात मान्य जुइकथं तयार यायेगु सहमति जूगु खँ कनादीगु दु । नेपाः व भूटान दथुइया व्यापारया निंतिं मू नाका पूर्वया काँकडभिट्टाय् लाःगु मेची भन्सार खः । मेची भन्सार कार्यालय काँकडभिट्टा जुयाः नेपालं भूटानय् सामान निर्यात यायेगु व भूटानं नेपालय् सामान हयेगु जुयाच्वंगु दु ।
नेपाःया मेगु छुं नं नाकां भूटानया स्थलमार्गयात स्वानाच्वंगु मदु । पूर्वी नाका काँकडभिट्टां प्यघौया यात्रा लिपा भूटान व भारत दथुया सीमा जयगाउँ–फुन्त्सोलिङ थ्यनी । थ्व नेपाः व भारतं भुटान दुहां वनीगु मू लुखा खः । नेपालं भुटानय् सामान छ्वयेत जुइमा वा भुटानं नेपालय् सामान हयेत जुइमाः भारतया लँपु धाःसा थी हे माः ।
LEAVE YOUR COMMENTS