बजारय् वैध लुँ तसकं म्हो

येँ (नेपालभाषा टाइम्स)÷ नेपालय् वैधानिक रुपं दुहां वयेगु यानाच्वंगु लुँया आयात म्हो जूगु दु । थगुने थ्वहे ईया न्यालाय् गुलि लुँ दुहां वःगु खः, थुगुसीया न्यालाय् व स्वयां २६५ किलो लुँ म्हो आयात जूगु दु । मंसिर तकया दुने १ हजार २ किलो जक लुँ वैधानिक रुपं दुहां वःगु दु ।

वंगु छुं ई न्ह्यवंनिसें तस्करीया लँपु जुयाः छ्यापछ्याप्ती लुँ दुहां वःगु खःसा उकिया नापनापं हे वैधानिक लँपुं दुहां वइगु लुँ धाःसा म्हो जूगु खः । तर लुँ व्यवसायीतय्सं धाःसा अवैध लुँ यक्व दुहां वःगु कारणं वैध लँपुं लुँ दुहां वइगु कम जूगु खः धइगु खँयात धाःसा अस्वीकार याःगु दु । व्यवसायीतय् कथं लुँ आयात म्हो जूगुया मू कारण नेपाःमिया क्रयशक्ति म्हो जूगुलिं खः ।

नेपाल सुनचाँदी व्यवसायी महा संघया पुलांम्ह नायः लिसें बजाः विश्लेषक तेजरत्न शाक्यं कनादीकथं छखे लुँया भाः निरन्तर थहां वनाच्वंगु व मेखे नेपाःमि जनताया क्रयशक्ति ह्रास जूगु कारणं लुँ झिके यायेगु हे म्हो जूगु खः । वय्कःया कथं न्हापा झितोला लुँ माःगु ब्याहा भ्वय् थौंकन्हय् छतोला नितोलां गाकाच्वंगु दु ।

थौं कन्हय् नेपाःया लुँवहःया बजारय् लुँया मागः ७५ प्रतिशत धइथें म्हो जुयाच्वंगु दु । थुकिं यानाः लुँवहः व्यवसायीतय् व्यापार २५ प्रतिशत जक जुयाच्वंगु दु । न्हूगु लुँ न्यायेगु स्वयां पुलांगु लुँयात हे न्हूकथं दयेकाः ज्या चले याइपिनिगु ल्याः अप्वयाच्वंगु दु ।

थौंकन्हय् तस्करीया लँपु जुयाः यक्व लुँ वयाच्वंगु कारणं जकं वैध लुँया आयात म्हो जूगु खः ला धइगु न्ह्यसःयात धाःसा वय्कलं पूवंक नकारे यानादिल । ‘तस्करीया लुँपाखें नेपाःया व्यापारय् अपाय्च्वः लिच्वः मलाः,’ वय्कलं धयादिल, ‘मू खँ नेपाःमि जनताया आय हे म्हो जुयाच्वंगु दु । उकिया लिच्वः थौंकन्हय् बजारय् लानाच्वंगु खः ।’इहिपाःया सिजनय् लुँया माग मदुगुलिं तस्करीया लिच्वः नेपाःया लुँवहः बजारय् लानाच्वन धायेगु पाय्छि मजुइ बिचाः नं वय्कलं प्वंकादिल ।

न्हापा न्हापा जूसा इहिपाःया सिजनय् लुँवहः व्यवसायीतय् ज्या यायेत तकं लिमलाइगु जक मखु बजारय् लुँ अभाव जुयाः प्यद्वः निसें न्याद्वः तका तक अप्वः ध्यबा पुलाः लुँ न्याये मालीगु अवस्था वइगु खः । थुगुसी धाःसा बजाः हे सुनसान जुयाच्वंगु खँ नं वय्कलं कनादिल ।