
येँ – लुम्बिनी विकास कोषं शान्तिनायक भगवान गौतम बुद्धया जन्मस्थल लुम्बिनीइ स्वांयाःपुन्हिया निंतिं तयारी तीव्र रुपं न्ह्याकूगु दु । कोषं लुम्बिनीइ जुइगु अन्तर्राष्ट्रिय बौद्ध सम्मेलन नापं २५६२ क्वःगु स्वांयाःपुन्हि तःजिक हेनत तीव्र रुपं तयारी न्ह्याकूगु खः । ज्याझ्वः तःजिक सफल यायेत कोषं उकथं हे तयारीयात नं तीव्रता बिया वयाच्वंगु दु । बौद्ध सम्मेलन नापं स्वांयाःपुन्हिया निंतिं कोषं प्रधानमन्त्री केपी ओलीया संयोजकत्वय् ५०१ दुजः दुथ्याःगु छगू मूल समारोह समितिलिसें थीथी झिंस्वंगू उपसमिति नं गठन याःगु दु ।
लुम्बिनीइ जुइगु अन्तर्राष्ट्रिय बौद्ध सम्मेलनय् नेपाःलिसें चीन, भारत, जापान, फ्रान्स, पोल्याण्ड, मलेशिया, जर्मनी, श्रीलंका लगायतया देशं ब्वति काइगु जुयाच्वंगु दु । अथे हे सम्मेलनय् झिंन्यागू देय्या प्रतिनिधि व पर्यवेक्षकं ज्यापौ नं न्ह्यब्वइ ।
वइगु बैशाख १५ व १६ गते निन्हुयंकं जुइगु बौद्ध सम्मेलन, १७ गते मू ज्याझ्वःकथं स्वांयाःपुनिह नापं लुम्बिनी दिवस नं हनीगु ज्याझ्वलय् करिब न्यासः मनुखं प्रत्यक्ष रुपं ब्वति काइगु जुयाच्वंगु दुसा ज्याझ्वलय् देय् दुने व पिनेया भिक्षु भिक्षुणी यानाः छगूत्या लाख स्वयां अप्वःसिया सहभागिता दइगु कोषं न्ह्यथंगु दु ।
बौद्ध सम्मेलन, स्वांयाःपुन्हि व लुम्बिनी दिवस ज्याझ्वःया उलेज्याया निंतिं राष्ट्रपति विद्यादेवी भण्डारीलिसें प्रधानमन्त्री ओली लुम्बिनी झायादीगु जूगु दु । ज्याझ्वःया निंतिं स्वद्वः स्वयां अप्वः मनू न्ह्यनीकथं थाय्या व्यवस्थापन यायेगु ज्या जुयाच्वंगु दु ।
अथे हे सम्मेलनया निंतिं झण्डै प्यंगू करोड तका लागतय् अस्थायी हल निर्माण यायेगु ज्या नं जुयाच्वंगु दुसा आतकया दुने सभाहल दयेकेगु ज्या ३५ प्रतिशत स्वयां अप्वः क्वचाये धुंकूगु दु ।
LEAVE YOUR COMMENTS