दर्ता जूसां सिण्डिकेट कायम !
आखिर यातायात सिण्डिकेट तोडे याये मफइगु जुल
येँ – दछि न्ह्यः नेपाः सरकारं अतिकं फुर्तिफार्ति यानाः यातायात सिण्डिकेट तोडे यायेगु धकाः व्यवसायीतय्त ज्वनेगु व उमिगु गाडी हे चले मयाकेगु तकया ज्याखँत याःगु खः । सिण्डिकेट तोडे यायेगु लागिं सरकारं यातायात संघय् दर्ता जुयाच्वंगु फुक्क हे यातायात व्यवसायीतय्त संघ खारेज यानाः कम्पनीइ दर्ता जू वा धकाः आह्वान याःगु खः ।
तर यातायात व्यवसायीतय् संघ खारेज जूसां कम्पनीइ दर्ता जुइगु क्रम धाःसा बिचाः याःगु सिबें नं तसकं कम जूगु दु । वंगु दछिया दुने यातायात व्यवसायी व सरकार दथुइ जुयाच्वंगु थीथी ज्याखँ स्वयेबलय् आः व्यवसायीतय्सं संघ खारेज याःसां सिण्डिकेट धाःसा कायम हे याना तइगु सम्भावना प्रवल जुया वःगु खँ धाःगु दु ।
सरकारं सिण्डिकेट तोडे यायेगु लागिं संघ खारेज यानाः कम्पनी दयेकाः दर्ता जू वा धकाः आह्वान याःगु खः । आः यातायात व्यवसायीतय्सं थःपिंत कम्पनीइ दर्ता याःसां सिण्डिकेट चाहिँ मेगु रूपय् कायम हे याना तयेगु संरचना तयार यायेधुंकूगु खँ सूत्रं धाःगु दु । कम्पनीइ दर्ता जुइबलय् सरकारयात कर ला प्राप्त जुइ तर सिण्डिकेट धाःसा थुकिं तोडे मजुइगु दावी सूत्रं याःगु दु ।
देशय् करिब ३०० गू यातायात संघ चायेकाः उकी द्वलंद्वः गाडी आवद्ध जुयाच्वंगु दु । तर आः तक १४–१५ गू जक कम्पनी दर्ता जू वःगु दु । देशय् गुलि यातायात संघ दुगु खः कम्पनी नं उलि हे दर्ता जुइगु आशा जुयाच्वंगु खः । कम्पनी जुइसातकि यातायात व्यवसायीत नं करया दायराय् दुहां वइगु आशा यानातःगु दु ।
अज्याःगु कम्पनी दर्ता यायेबलय् उकी १०० म्ह स्वयां अप्वः शेयर होल्डर तये दइ मखु धकाः न्हापा यानातःगु व्यवस्थायात खारेज यानाः आः न्ह्याक्व नं शेयर होल्डर तये फइगु व्यवस्था सरकारं याना बीधुंकूगु दु । अय्नं दर्ता याःया यक्व मजूनि ।
जेठ १८ गते तक दर्ता जुइ ला ?
यातायात कम्पनी चायेकाः दर्ता जू वयेगु लागिं सरकारं थ्वहे वइगु जेठ १८ गते तक अन्तिम म्याद बियातःगु खः । थ्व स्वयां न्ह्यः थ्व म्याद फागुन मसान्त तक बिउगु खःसां सुं नं व्यवसायी दर्ता जू वइगु सम्भावना मखनेवं म्याद बढे यानाः जेठ १८ गते तक थपे याना बिउगु खः । आः जेठ १८ वयेत खुन्हुु जक ई ल्यंदनि ।
तर दर्ता जू वःगु कम्पनीया ल्याः धाःसा १५ गू ति जक दु । व्यवसायीतय्सं कम्पनी दर्ता जुइधुंकाः न्हापा संघया नामय् लानाच्वंगु चलअचल सम्पत्ति फुक्क थःपिंत हे लित बीमाः धकाः माग याःगु दु । दछि न्ह्यः संघ खारेज यायेवं संघतय्सं मुंका तःगु अर्बौं तका दां नं सरकारं ‘जफत’ याना बिउगु खः ।
LEAVE YOUR COMMENTS