राष्ट्रिय ज्ञानमाला समितिया नीप्यक्वःगु वार्षिक साधारणसभा
येँ- नेपाल राष्ट्रिय ज्ञानमाला समितिया नीप्यक्वःगु वार्षिक साधारणसभा च्वबहालय् च्वंगु सुलक्षण कीर्ति विहारय् जुल । समितिया केन्द्रीय नायः रमना श्रेष्ठया सभापतित्वय् जूगु ज्याझ्वःया उलेज्या मूपाहां वाङ्मय शताब्दी पुरुष सत्यमोहन जोशीं यानादीगु खः ।
विहार प्रमुख डा. अनोजा गुरुमांपाखें बोधिमत च्याकाः शीलप्रदान याना बिज्याःगु ज्याझ्वलय् सभापति श्रेष्ठं लसकुस यासें ज्ञानमाला भजनया विकास व विस्तारया निंतिं थीथी ज्याझ्वः न्ह्याका वनेगु जुइ धयादिल । समितिया मूछ्यांजे इन्द्रमुनी शाक्यं वार्षिक प्रगति प्रतिवेदन न्ह्यब्वसें स्वदँया कार्य योजनाकथं ज्ञानमाला भजन गुरुपिंति हनेगु, ज्ञानमाला शिविर संचालन नापं थीथी ज्याझ्वः याना वनेगु बारे जानकारी बियादीगु खः ।
अथे हे दांभरिं सप्तराज शाक्यं वार्षिक आय व्यय व वासलात न्ह्यब्वयादिसें स्थानीय ज्ञानमाला भजन, क्षेत्रीय उपसमिति व केन्द्रया आर्थिक कोष बल्लाकेत खुत्रुके दान पात्र योजना हयागु नापं उकियापाखें प्राप्त आर्थिक संकलनमध्ये ३० प्रतिशत केन्द्रयात ३५ प्रतिशत क्षेत्रीय उपसमितिाियात व ३५ प्रतिशत स्थानीय ज्ञानमाला भजन खलःयात बीगु योजना न्ह्यब्वयादीगु खः ।
मूपाहां जोशीं ज्ञानमाला भजन बुद्धया दर्शन खः धासें ज्ञानमाला भजन हालेगु नं छगूकथं ध्यानय् च्वनेगु थें हे खः धयादिल ।
उगु ज्याझ्वलय् नेपाल राष्ट्रिय ज्ञानमाला समितिया ललितपुर क्षेत्रीय उपसमितिया संयोजक लक्ष्मीबहादुर महर्जन, कीर्तिपुर–चन्द्रागिरी क्षेत्रीय उपसमितिया छ्याञ्जे बुद्ध महर्जन, भक्तपुर जिल्ला क्षेत्रीय उपसमितिया पुण्यरत्न शाक्य, काभ्रे जिल्लाया लक्ष्मीदेवी मानन्धर, पूर्वाञ्चलपाखें पंचु शाक्य, पश्चिमाञ्चलपाखें केशवलाल वज्राचार्यं क्षेत्रीय प्रतिवेदन न्ह्यब्वयादीगु खः । ज्याझ्वलय् समितिया संरक्षक प्रा. सुवर्ण शाक्य, सल्लाहकारपिं महारत्न बज्राचार्य, किरणकुमार जोशी, शान्तकुमार चित्रकार व पंचु शाक्ययात दोसल्लां न्ययेकाः हनेज्या नं याःगु खः ।
समितिया संरक्षक प्रा. शाक्यं नं नुगःखँ तयादीगु ज्याझ्वलय् ज्ञानमाला भजन खलः किपूपाखें ज्ञानमाला भजन न्ह्यब्वःगु खःसा ज्याझ्वलय् नेपान्यंकंया न्हय्खुगू ज्ञानमाला भजन खलःया थ्यंमथ्यं प्यसःम्ह प्रतिनिधिय् सहभागिता दुगु खः ।
LEAVE YOUR COMMENTS