समाजसेवी डंगोल मदुगुलिं यलया मेयरपाखें समवेदना पौ लःल्हात

यल (नेपालभाषा टाइम्स) – ख्वनाया समाजसेवी देवबहादुर डंगोल मदुगुलिं यल महानगरपालिकाया मेयर चिरिबाबु महर्जनं वय्कःया छेँजःपिंत समवेदनापौ लःल्हानादीगु दु ।

मेयर महर्जनं लःल्हानादीगु समवेदना पतिइ मदुम्ह डंगोलया योगदानयात अतिकं च्वछासें वय्कःया छेँजःपिंसं धैर्य धारण यायेफयेमा धकाः कामना यानातःगु दु । समाजसेवी डंगोल वंगु कात्तिक १ गते नलास्वां पीकुन्हु मदुगु खः । ज्यापु महागुथि नेपाःया संरक्षक वय्कलं जाति, भाषा, धर्म, संस्कृति ख्यलय् तःधंगु योगदान यानादीगु दु ।

वय्कःया अन्येष्टीइ महागुथिया केन्द्रीय नायः लोककवि राजभाइ जकःमि, मूछ्यांजे मचाराजा महर्जन, केन्द्रीय दुजः अष्टमान महर्जन, बाबुकृष्ण महर्जन, ज्यापु महागुथि नेपाः, यल जिल्ला समितिया नायः रघुनाथ महर्जन, छ्यांजे राममान महर्जन, ख्वना लागाया गन्यमान्य व्यक्तित्वपिं उपस्थिति दुगु खः चय्न्यादँ दुम्ह वय्कःया जहान व प्यम्ह काय् व निम्ह म्ह्याय् दु। वय्कः ज्यापु महागुथि नेपाःया केन्द्रीय दुजः, लिधंसा पासा पुचःया नायः, नेवाः देय् दबू प्रदेश समितिया दुजः शरण गोपाल डंगोल व नेवाः देय् दबू यल जिल्ला समितिया सचिव सिद्धि गोपाल डंगोलया अबु खः । वय्कः मदुगु दुःखय् कन्हय् बिहिवाः सनिलया ६ ताः इलय् जूम पाखें ज्यापु महागुथि नेपाःपाखें बिचाः हायेके मुँज्या जुइगु जूगु दु ।

सम्बन्धित बुखँ

LEAVE YOUR COMMENTS