तातोपानी चायेकेत चीन तत्पर, नेपाः सुस्त

येँ – तःभुखाय् लिपा नेपाः व चीन दथुया प्रमुख व्यापारिक नाका तातोपानी भन्सार बन्द जूगु खःसा आः उकियात चायेकेत चीन सरकारं कुतः शुरु याःगु दु । भुखाय् लिपा चीनं थ्व नाका बन्द यासें उकिया विकल्पय् केरुङ नाका चायेकूगु खः । तर नेपाल सरकारं थ्व नाका नं चायेके माली धकाः चीनयात तारन्तार इनाप याःगु खः ।

उकिया हे सम्बोधन यासें चिनियाँ पक्षं थ्व नाका चायेकेगु निंतिं थःपिनिगु लागाय् ज्या न्ह्याकाच्वंगु दु । तर चीनं थःगु लागाय् ज्या शुरु याःसां नेपाःपाखें धाःसा आः तक थःगु लागाय् यायेमाःगु छुं नं ज्या मजूगु खँ सीदुगु दु ।चिनियाँ पक्षं थ्वहे वइगु वैशाख १८ गते तकया दुने नाका चायेकेगु कथं ज्या न्ह्याकाच्वंगु खँ धाःगु दु ।

बाह्रबिसे नगरपालिकांनिसें मितेरी ताँ तक २६ किलोमिटर ताःहाकःगु सतक भुखाचं ध्वस्त जूगु खः । उगु २६ किलोमिटर सतक दयेकेगु जिम्मा चिनियाँ पक्षं कयातःगु दु । चिनियाँ पक्षं नाका सञ्चालन यायेगु लागि मू रुपं स्वंगू संरचनाया ज्या यानाच्वंगु दु । उकिया लागिं बिस्कं बिस्कं ठेकेदार कम्पनीतय्त ज्या बिया तःगु खँ धाःगु दु ।

नेपाः–चीन स्वाइगु मितेरी ताँ, बाह्रबिसेंनिसें मितेरी ताँ तकया सतक व सुख्खा बन्दरगाहया ज्यायात चिनियाँ पक्षं प्राथमिकताय् तयाः ज्या यानाच्वंगु दु । तर नेपाःया थःगु हे थासय् यायेमाःगु धाःसा छुं हे ज्या शुरु मजूगु खँ धाःगु दु । तःभुखाय् लिपा नेपाः पाखेया संरचना न्हापा गथे खः अथे जुयाच्वंगु दनि । अनया भन्सार यार्ड लथालिंग जुयाच्वंगु दुसा भन्सार कार्यालय दयेकेगु ज्या नं आः तक शुरु हे मजूनिगु खँ धाःगु दु । चीनं थःपिंसं ज्या यानाच्वनागु जानकारी नं बिउगु मदुनि ।