कीर्तिपुर अस्पतालय् बाल चिकित्सा वार्ड

किपू – कीर्तिपुर अस्पतालय् निर्माण याःगु बाल चिकित्सा वार्डया उलेज्या याःगु दु । नेपाःया निंतिं जर्मनीया राजदूत डा. थोमस प्रिन्जं अस्पतालय् निर्माण याःगु बाल चिकित्सा वार्डया उलेज्या यानादीगु खः ।

नेपालमेड इभि जर्मनीया ग्वाहालिइ अस्पतालय् उगु वार्ड निर्माण याःगु खः । वार्ड निर्माणलिपा अस्पतालय् मस्तय्सं सहज व सुलभ रुपय् गुणस्तरीय सेवा काये खनीगु विश्वास याःगु दु ।

उगु इलय् राजदूत प्रिन्जं जर्मन सरकारं विकास सहयोग अन्तर्गत नेपाःया थीथी परियोजनाय् ताःई न्ह्यवनिसे ग्वाहालि याना वयाच्वंगु खँ न्ह्यथनादिसें नेपाःया उर्जा, स्थानीय सरकारया सवलीकरण व स्वास्थ्यया ख्यलय् नं ग्वाहालि याना वयाच्वंगु खँ कनादिल ।
बाल चिकित्सायात सर्वसुलभ यायेमाःगु अतिकं आवश्यक दु धासें राजदूत प्रिन्जं वइगु दिनय् नं थुकथंया ग्वाहालियात निरन्तरता बियाच्वनेगु प्रतिवद्धता प्वंकादिल ।

किपू नगरपालिकाया प्रमुख रमेश महर्जनं नेपालमेड संस्थां नागरिकस्तरं किपूया स्वास्थ्य, शिक्षाया ख्यलय् योगदान बिया वयाच्वंगुयात कयाः च्वछायादिल ।

फेक्ट नेपालया अध्यक्ष डा. भरत प्रधानं जर्मनय् च्वनाः थीथी ख्यलय् ज्या यानाच्वंपिंं नागरिकया पहलय् नीस्वनातःगु नेपालमेड संस्थां २०७२ सालया भुखाय् लिपा नेपाःया स्वास्थ्य ख्यलय् गाक्कं ग्वाहालि याःगु खँ न्ह्यथनादिल ।

फेक्ट नेपालया कार्यकारी निर्देशक गौरी प्रधानं स्थानीय सरकारलिसेया सहकार्यय् सामुदायिक ढाँचाय् संचालन जुयाच्वंगु किपू अस्पतालं म्हो इलय् नं स्वास्थ्यया ख्यलय् विशिष्ट सेवा बीत ताःलाःगु खँ न्ह्यनादिल ।

अस्पतालया मेडिकल डाइरेक्टर डा. निजिमा ताम्राकारं नेपालमेडया ग्वाहालिइ कार्यान्वयनय् वयाच्वंगु थीथी स्वास्थ्य परियोजनाया बारे जानकारी बियादीगु खःसा नेपालमेडया अध्यक्ष डा. आर्ने ड्रिउजं संस्थां नेपाःया स्वास्थ्य ख्यःया पूर्वाधार निर्माण, मानव संशाधन विकास व दक्षता अभिवृद्धिइ ग्वाहालि याना वयाच्वंगु जानकारी बियादिल।