सम्पदा भवन संरक्षण व निर्माण सम्बन्धी अभिमुखीकरण ज्याझ्वः

येँ – येँ महानगरपालिकां भवन निर्माण व सहुलियत कार्यविधि कार्यान्वयनया निंतिं प्राविधिक सहजकर्ता खटे याइगु जूगु दु । येँ महानगरं सम्पदा भवन संरक्षण, निर्माण मापदण्ड व सहुलियत कार्यविधि कार्यान्वयन यायेत प्राविधिक सहजकर्ता खटे यायेत्यंगु खः ।

येँ महानगरपालिका सम्पदा तथा पर्यटन विभागया ग्वसालय् जूगु ‘सम्पदा भवन संरक्षण एवं निर्माण सम्बन्धी अभिमुखीकरण ज्याझ्वलय् उकिया जानकारी बिउगु खः । उकिया निंतिं येँ महानगरं सार्वजनिक सुचंपाखें सूचीकृतया निंतिं प्राप्त ६० गू निवेदनमध्ये पीम्हेसित सुचीकृत यानाः ग्वाहालि कायेत्यंगु खः।

अभिमुखीकरण ज्याझ्वलय् नवासें येँ महानगर प्रमुख शाक्यं येँ महानगरया सहरी व्यवस्थापनय् गुकथं बस्ती व्यवस्थापन यायेगु धइगु विषयय् थःपिंसं ताःहाकः हे सहलह ब्याकागु खँ कनादीगु दु । ‘एकीकृत बस्तीया खँ ल्ह्वनाच्वनागु दु । वसन्तपुलिं दक्षिण भेगया ६३० खा छेँया अध्ययन यानाः प्रारम्भिक रुपय् न्यय्प्यखा छेँया इकीकरण यानाः सहरी सेवा सुविधा थ्यंकेगु योजना दयेकागु दु’, महानगर प्रमुख शाक्यं धयादिल, ‘तू नकातःगु छेँखात चिइकाः दक्वं छेँय् जः थ्यंकेगु, मोटर थ्यंकेगु व एकीकृत सहरी सेवा थ्यंकेगु योजना दयेकागु दु ।’

२०७२ सालया भुखाय् लिपा थ्व विषय तसकं चर्चा जूगु खःसां कार्यान्वयनया चरणय् वनेत्यःगु इलय् सम्पत्ति हक सुरक्षाया न्ह्यसः दुं व उकिया लिसः बीत स्पष्ट कानून मदुगुलिं ज्या न्ह्याके मफुगु वय्कःया धापू दु ।

‘राज्यं धयां जक मजिउ । ग्वाहालि नं यायेमाः धकाः जिमिसं मौलिक भवन दयेकेत मापदण्डया लिधंसाय् अनुदान बीगु कार्यविधि नं दयेकागु दु’ वय्कलं धयादिल, जिमिसं जिमिगु नीति कार्यान्वयनय् छिकपिनिगु नं सहभागिता दयेमा धइगु इच्छा यानाच्वनागु दु । उकिं नीतियात व्यवहारिक यायेत छिकपिनिगु नं छुं सल्लाह, सुझाव दुसा जिमित बियादिसँ, जिमिसं ग्रहण यायेगु जुइ ।’

उपप्रमुख हरिप्रभा खड्गी श्रेष्ठं आःया जनप्रतिनिधियात सांस्कृतिक मौलिक सहर दयेकेगु जिम्मेवारी प्राप्त जूगु व थ्व छगू ह्वःताः नं खः धासें सम्पदा क्षेत्रयात कोलाहलमुक्त, विकृतिमुक्त याये तसकं थाकु धयादिल । येँ महानगर मेमेगु नगर थें व्यवस्थापन याये अःपु मजूगु वय्कःया धापू दु ।

प्रमुख प्रशासकीय अधिकृत लोकनाथ पौड्यालं मौलिकता ल्यंकातःगु सहरया सीप, कला, क्षमता सयेका थप छुं याये फइ धासे अथे यायेबलय् छगू जक पक्षयात जक मखु, एकीकृत पक्षयात हे ध्यान बीमाःगु खँय् बः बियादिल ।

सम्पदा तथा पर्यटन समितिया संयोजकनापं १८ वडाअध्यक्ष न्हुछेकाजी महर्जनं एकीकृत आवास दयेकेगु इलय् सम्पत्तिया हकया खँ पिहां वःगु वव उकियात संबोधन यायेत कानून मदुलिं गति काये मफुगु खः धयादिल।

अभिमुखीकरण ज्याझ्वलय् सहरी योजना आयोगया उपाध्यक्ष सरोज बस्नेत, येँ महानगरया उपनिर्देशक श्रृजु प्रधान, सम्पदा व भवन संरक्षण विज्ञ सूर्यभक्त सांगाछेँ, सहरी योजना विद् निलिमा थापा श्रेष्ठं नं नुगःखँ तयादीगु खः ।

सम्बन्धित बुखँ

LEAVE YOUR COMMENTS