तत्काल संविधान संशोधन जुइ मखुनि

येँ – प्रधानमन्त्री केपी ओली नेतृत्वया सरकारय् दुहां वने न्ह्यः सरकार व संसफो दथुइ संविधान संशोधन यायेगु धकाः सहमति जूगु खःसां आः तत्काल संशोधन जुइगु छुं हे संकेत मदुगु खँ सीदुगु दु ।

संघीय समाजवादी फोरम संविधान संशोधनया माग तयाः आन्दोलन याना वयाच्वंगु खःसा संविधान संशोधन यायेगु खँय् सरकार व पार्टी दथुइ सहमति जुइवं संसफो नं सरकारय् दुहां वंगु खः । संसफोया अध्यक्ष उपेन्द्र यादव थौंकन्हय् उपप्रधान लिसें स्वास्थ्यमन्त्री जुयाच्वंगु दु ।
तर संसफो सरकारय् दुहां वंगु उलिमछि दयेधुंकलं नं थ्व पार्टीलिसे सरकारं याःगु सम्झौता कथं संविधान संशोधन जुइगु संकेत धाःसा वःगु मदुनि ।

आः नकतिनि उपप्रधानमन्त्री यादवं संविधान संशोधनया लागिं तयारी जुयाच्वंगु दु धकाः न्ववानादीसां पार्टी दुने उकिया छुं कथंया खँ धाःसा मजूगु दावी सूत्रं याःगु दु ।

ससफो सरकारय् दुहां वनेधुंकाः संविधान संशोधनया सम्बन्धय् छुं हे खँ न्ह्याः मवनाच्वंगु खँ नं सूत्रं दु । सूत्रया कथं संसफो सरकारय् दुहां वनेधुंकाः संविधान संशोधनया निंतिं गुगुं नं कथंया दवाव बीगु ज्या नं याःगु मदु । संसफोया सहअध्यक्ष लिसें सांसद राजेन्द्र श्रेष्ठं संशोधनया छुं हे खँ न्ह्याः वनाच्वंगु मदु धासें संशोधन जुइत छुं भचा ई काइगु जानकारी बियादिल ।

थ्वहे झ्वलय् संविधान संशोधन यायेत सरकारं छुं हे कुतः मयाः धासें राष्ट्रिय जनता पार्टीं सरकारयात बियातःगु समर्थन लित कायेगु ख्याच्वः बिउगु दु ।