आः मन्त्रीस्तरय् कोरोना संक्रमण

न्यायाधीश, मन्त्री व सचिवत नं आइलेशनय् च्वनेगु शुरु

येँ (नेपालभाषा टाइम्स) – वडा अध्यक्ष, मेयर व प्रधानमन्त्रीया सल्लाहकार धुंकाः आः क्याबिनेटस्तरीय मन्त्रीतय्त कोरोना संक्रमण शुरु जुया वःगु दु। संस्कृति, पर्यटन तथा नागरिक उड्डयन मन्त्री योगेश भट्टराई लिपा आः शिक्षा मन्त्री गिरिराजमणि पोखरेलयात नं कोरोना संक्रमण जूगु दु ।

मन्त्रीतय्त कोरोना पोजिटिभ जुइवं उकिया लिच्वः धाःसा मेमेगु नं आपालं थासय् लाः वंगु दु। पर्यटनमन्त्री भट्टराईयात कोरोना संक्रमण जुइवं उकिया लिच्वः कथं नेपाःया लागिं भारतीय राजदूत समेत आइसोलेशनय् च्वनेमाःगु अवस्था वःगु दु। मन्त्री भट्टराईयात कोरोना पोजिटिभ जुल धइगु खबर वयेवं भारतीय राजदूत विजयमोहन क्वात्रा नं आइसोलेशनय् च्वनादीगु दु । वय्कलं म्हिगःनिसें हे मनू नापलायेगु बन्द यानादीगु दु। थुकिया नापनापं भारतीय दूतावासया मेम्ह छम्ह कर्मचारी नं लाइसोलेशनय् च्वनेमाःगु खँ धाःगु दु ।

अथे हे मन्त्री भट्टराईलिसे नापं यात्रा यानादीम्ह गृह सचिव महेश्वर न्यौपाने नं आइसोलेशनय् च्वनादीगु खँ सीदुगु दु। मन्त्री भट्टराईयात कोरोना पोजिटिभ जुल धइगु खबर वयेवं गृह सचिव न्यौपाने आइसोलेशनय् च्वनादीगु खः ।

उखे स्वनिगःया प्रहरी डीआईजी विश्वराज पोखरेल नं आइसोलेशनय् च्वनादीगु दु। वय्कः नं मन्त्री भट्टराईलिसे नापं यात्रा यानादीम्ह खः । डीआईजी पोखरेलयात कोरोना संक्रमणया शंका जुइवं नेपाल प्रहरीया आपालं प्रहरी अधिकारीत चिन्तित जूगु खँ सीदुगु दु ।

छुं न्हि न्ह्यः तिनि प्रधानमन्त्री केपी ओलीया प्यम्ह सल्लाहकारतय्त छक्वलं कोरोना संक्रमण जूगु खः । उगु इलय् प्रम ओलीया नं पीसीआर टेस्ट काःगु खःसा वय्कःया लिच्वः धाःसा नेगेटिभ पिहां वःगु खः ।

थ्व इलय् सर्वो च्च अदालतया स्वम्ह न्यायाधीशपिं नं कोरोना संक्रमित जुयाः होम क्वारेन्टाइनय् च्वनाच्वंगु दु। लिसें प्रहरी व सेनाया अधिकारीत नं कोरोना संक्रमित जुयाः छेँय् च्वनाच्वंगु दु । थ्वहे झ्वलय् येँ मनपा वडा १४ या इन्जिनीयर लगायत स्वम्ह कर्मचारी कोरोना पोजिटिभ खने दयेवं प्यन्हुया लागिं वडा ज्याकू बन्द याःगु खँ सीदुगु दु ।

उकथं हे यलया यातायात कार्यालयया प्यम्ह कर्मचारीयात नं कोरोना भाइरस संक्रमण जुइवं अनिश्तिकालीन रुपं यातायात कार्यालय बन्द याःगु दु। कार्यालय बन्द जूगु कारणं यानाः लाइसेन्स कायेगुया लिसे सवारी साधनया कर पुलेत नं समस्या जूगु दु ।