ने. सं. ११४४ कछलागा तृतीया -

विचार त्वःताः सत्ताकेन्द्रित तालमेलया अभ्यास

येँ- स्थानीय चुनाव न्ह्यःने थ्यंकः वःलिसे राजनीतिक पार्टीतय् दथुइ तीव्र ढंगं न्ह्याः वंगु तालमेलया प्रक्रिया स्वयेबलय् आः नेपाःया बहुदलीय व्यवस्था बुलुहुँ ‘निगू दलीय’ व्यवस्थाय् हिलेत्यंगु संकेत खने दया वःगु बिचाः विज्ञतय्सं तया हःगु दु ।

स्थानीय चुनावय् छखे कांग्रेस, माओवादी, नेकपा (एस) लगायतया दलत छथाय् च्वनाः मोर्चा दयेकूगु दुसा मेखे एमाले, राप्रपा नेपाल, परिवार दल थेंज्याःगु पार्टीत छथाय् च्वनाः मेगु मोर्चा दयेकूगु दु । थ्व ल्याखं आःया स्थानीय चुनाव थीथी दलतय् दथुइ मखु कि निगू मोर्चाया दथुइ जुइगु खः लाकि धइगु संकेत बिउगु खनेदु ।

पुलांम्ह प्रमुख निर्वाचन आयुक्त भोजराज पोखरेलं आः जुयाच्वंगु चुनावी तालमेलं देशय् राजनीतिक दलतय्गु संख्या म्हो जुजुं वनाः अन्तिमय् निगू दल दथुइ जक धेंधेंबल्लाः जुइगु संकेत खः धयादीगु दु । बीबीसी नेपाली सेवालिसे खँ ल्हासें वय्कलं आः चिचीधंगु दलत चुनावी धेंधेंबल्लाः याये मफुत धाःसा तःधंगु दलय् विलय जुइगु वा छगू हे चुनाव चिं कयाः ल्वायेगु अवस्थाय् थ्यनीगु खँ नं कनादिल ।

थज्याःगु चुनावी तालमेलय् तालमेल जूगु दलतय् दथुइ छुं कथंया राजनीतिक मेल धाःसा जुइम्वाःगु अवस्था नं खने दया वःगु दु । राजनीतिक दलतय् दथुइ सिद्धान्त व विचारया आधारय् मखुसा सत्ता कब्जा यायेगु रणनीतिया आधारय् जक तालमेल जुयाच्वंगु खँय् नं विज्ञतय्सं आश्चर्य प्वंकूगु दु । थ्व राजनीतिक तालमेलयात विज्ञतय्सं विचार व सिद्धान्तया तालमेल मखुसें सत्ताकेन्द्रित तालमेल जक खः धयाहःगु दु ।

छुं ई न्ह्यः तिनि नेकपा –एमाले) या छुं नेतातय्सं आः नेपाःया राजनीतिक चाहे जूसां मजूसां ‘निगू दलीय’ जू वनीगु बिचाः प्वंकादीगु खः । खास यानाः अमेरिकाय् निगू दल दथुइ जक चुनावी धेंधेंबल्लाः जुइगु स्थितियात दसुया रुपय् न्ह्यःने तसें नेपालय् नं आः वहे अवस्था वइगु बिचाः वय्कःपिंसं अबलय् तयादीगु खः । अबलय् बिचाः तःथें आः व्यवहारय् अथे हे जू वनाच्वंगु संकेत खने दया वःगु खँ नं विज्ञतय्सं धयाहःगु दु ।

राजनीति निगू दलीय जू वनाच्वंगु थ्व संकेत तःधंगु दलतय्गु लागिं सुखद् थें खनेदुसां थीथी कथंया विविधतां जाःगु नेपाःया लागिं थ्व बांलाःगु अभ्यास धाःसा मजुइगु खँ नं धयाहःगु दु । निगू दलीय धेंधेंबल्लाखं विविध विचाः व विविध सिद्धान्तयात थाय् मबीबलय् उकिं आम असन्तोष व विद्रोह ब्वलंकीगु खतरा समेत दुगु बिचाः नं थन प्वंकाहःगु दु ।

अथेहे गुलिखे विश्लेषकतय्सं आः जुयाच्वंगु हे गठबन्धनं हे यदि चुनाव त्याकीगु स्थिति पिहां वल धाःसा कन्हय् वनाः थ्व स्थायी मजुइगु अवस्था वयेफुगु खँ नं धयाहःगु दु । आःया गठबन्धन मुक्कं सत्ताया लागिं जुयाच्वंगु कारणं चुनाव लिपा गज्याःगु सत्ता गठबन्धन बने जुइगु खः व धाये मफइगु जूगुलिं थुकिं वनाः कन्हय् राजनीतिक अस्थिरता ब्वलनेफुगु खँ धाःगु दु ।