‘भाषाया विकास मजूसा देशया विकास नं जुइ मखु’

येँ – अन्तर्राष्ट्रिय मांभाय् दिवसया लसताय् म्हिगः थीथी ज्याझ्वःत जुल । थ्व लसताय् नेपाल प्रज्ञा प्रतिष्ठानय् बहुभाषिक कवि गोष्ठी ज्याझ्वः जुल । ज्याझ्वलय् उपराष्ट्रपति नन्दबहादुर पुन मूपाहां कथं झाःगु खः । ज्याझ्वलय् न्ववासें उपराष्ट्रपति पुनं नेपालय् आपालं भाषात दु, यदि थ्व भाषाया विकास जुइ मफुत धाःसा देशया विकास नं जुइ फइ मखु धयादिल । वय्कलं नेपाःया ४० प्रतिशत भाषात लोप जुइत्यंगु जुयाः थुकियात ल्यंका तयेगु लागिं नं कुतः जुइमाःगु बिचाः तयादिल ।

ज्याझ्वलय् विशिष्ट पाहां संस्कृति मन्त्री प्रेम बहादुर आलें भाषा धइगु हे देशया पहिचान जूगु कारणं थुकिया संरक्षण थौंया आवश्यकता खः धयादिल ।

ज्याझ्वलय् थीथी भाय्या कविपिंसं थःथःगु मांभासं कविता पाठ यानादीगु खः । कविता पाठ याइपिं आपालं साहित्यकारपिं थःथःगु जातीय भेषभुषा पुनाः ज्याझ्वलय् ब्वति काः वःगु खः ।

थ्वहे झ्वलय् आदिवासी जनजाति उत्थान राष्ट्रिय प्रतिष्ठानपाखें नं म्हिगः मातृभाषा राष्ट्रिय सिरपाः लःल्हायेज्या लिसें मातृभाषा कविता वाचन ज्याझ्वः यात । प्रतिष्ठानं थुगु दँय् नेपाल प्रज्ञा प्रतिष्ठानया पुलांम्ह उपकुलपति वैरागी काइँला (तिलविक्रम नेम्बाङ) यात
राष्ट्रिय मातृभाषा सेवा सिरपाः लःल्हाःगु खः । उगु ज्याझ्वलय् थीथी कविपिंसं थःथःगु मांभासं कविता पाठ यानादीगु खः ।

मांभाय् दिवसया हे लसताय् म्हिगः थनया प्रदिप्त पुस्तकालयय् नं केलत्वाःया स्थानीयवासीपाखें छगू ज्याझ्वः जुल । भाषिक कार्यकर्ता पवित्र कसाःया संयोजनय् जूगु उगु ज्याझ्वलय् नेपालभाषाया पुलांपिं व न्हूपिं आपालं साहित्यकारपिंसं साहित्य पाठया लिसें नुगःखँ प्वंकादीगु खः ।

अन्तर्राष्ट्रिय मांभाय् दिवसया लसताय् म्हिगः येँया थीथी स्कुलय् नं मस्तय्त थीथी मांभासं न्ववानाः मांभाय्या महत्व कनेगु ज्याझ्वःत याःगु खः ।

बंगलादेशय् मांभाय्या अधिकार प्राप्तिया लागिं जूगु आन्दोलनय् ज्यान बिउपिं सहिदपिनि लुमंतिइ थ्व दिवस हनेगु याना वयाच्वंगु खः । राष्ट्र संघीय निकाय युनेस्कों सन् १९९९ निसें विश्वन्यंकं हे मांभाय्या महत्व थुइके बीगु ताः तयाः थ्व न्हियात अन्तर्राष्ट्रिय दिवसया रुपय् हनेगु याना वयाच्वंगु खः ।

सम्बन्धित बुखँ

LEAVE YOUR COMMENTS