सूकीया लागिं धम्मावती गुरुमांया प्रार्थना
येँ -छुं ई न्ह्यः जूगु सैनिक ‘कू’ लय् लानाः नजरबन्दय् लाःम्ह म्यान्मारया प्रजा–तन्त्रवादी नेतृ आङ साङ सूकी याकनं रिहा जुइमा धकाः येँय् श्रद्धेय धम्मावती गुरुमांनं प्रार्थना यानाबिज्याःगु दु ।
बीबीसी नेपाली सेवालिसे खँ ल्हासें धम्मावती गुरुमांनं सूकीयात हानं ज्वनाः नजरबन्दय् तल धाःगु खँ न्यनाः थः तसकं दुःखी जुयागु खँ कनाबिज्याःगु दु । तर सूकीयात अनया सरकारं कुना बिउसां वय्कःयात याकनं रिहा याइ धकाः थम्हं कामना यानागु खँ नं कनाबिज्याःगु दु ।
सूकीयात थ्व स्वयां न्ह्यः अनया सैनिक सरकारं झिंच्यादँ तक कुना बिउ–बलय् तकं वय्कः छफुति विचलित मजुसे कैद भुक्तान यानादीगु खँ लुमंकुसें धम्मावती गुरुमांनं आः नं सूकी छफुति हे विचलित जूगु दइ मखु धकाः नं अनुमान यानाबिज्याःगु दु ।
थनिं प्यंंगू दशक न्ह्यः सूकी नेपाः वःबलय् सीघलय् च्वंगु धम्मावती गुरुमांया हे विहारय् च्वनादीगु खः । उगु इलय् सूकीं विकारय् आखः ब्वं वइपिं मस्तय्त अंग्रेजी स्यनादीगु खः । वय्कःया भाःत बेलायती खः गुम्ह कि छुं दँ न्ह्यः तिनि मंत ।
सूकी न्ह्याथेंज्याःगु व्यस्त ई ज्वनाः नेपाः वःसां नं सीघः विहारय् छक्वः दुहां वनाः गुरुमांयात नापलायेगु यानाच्वंगु दु । सूकीं गुरुमांयात नापलाइबलय् पुलिं चुयाः बौद्ध संस्कार कथं बन्दना यानादीगु खः । सूकीयात म्यान्मारय् सुयातं नापमलाकुसे नजरबन्दय् तयातःगु इलय् नं सूकीं थःगु नजरबन्द जुयाच्वंगु छेँय् हे भिक्षु गुरुमांपिंत भोजन सःतादीगु खःसा धम्मावती गुरुमांनं निक्वः तक अज्याःगु भोजनय् सरिक जुयाबिज्याःगु दु ।
LEAVE YOUR COMMENTS