भन्सार थकाःगुलिं लुँ तस्कर अझ अप्वइगु आशंका
येँ (नेपालभाषा टाइम्स)÷ सरकारं लुँ आयातय् भन्सार दर अप्वयेकेवं नेपालय् लुँया भाः थहां वनाः न्हूगु रेकर्ड कायम जूगु दु । म्हिगः नेपालय् लुँ तोलां १ लाख ४२ हजार २०० तका थ्यंगु खः । थ्व स्वयां न्ह्यः वंगु वैशाख ७ गते लुँ तोलां १ लाख ४१ हजार ८०० तका थ्यंगु खः ।
सरकारं आर्थिक दँया बजेटय् लुँया भन्सार दर २० प्रतिशत कायम यायेवं लुँया भाः थहां वनाः न्हूगु रेकर्ड कायम जूगु खँ नेपाल सुनचाँदी व्यवसायी महासंघया पुलांम्ह अध्यक्ष लिसें बजाः विश्लेषक तेजरत्न शाक्य ‘नेपालभाषा टाइम्स’ यात कनादीगु दु । थ्व स्वयां न्ह्यः लुँ आयातय् १५ प्रतिशत भन्सार कयातःगु खः ।
शाक्यया कथं सरकारं भन्सार दर अप्वयेकेवं आः लुँया तस्करी झन बढे जुइगु खनेदु । वय्कलं धयादिल, ‘लुँइ भन्सार अप्वयेकेवं लुँ तस्करी याइपिंत अप्वः मार्जिन दइ, गुकिं यानाः तस्करी याइपिंत अझ प्रोत्साहित याइ । सरकारं तस्कर नियन्त्रण यायेगु धाःसां नीति धाःसा पाय्छि अःखः वःगु दु ।’
म्हिगः अन्तर्राष्ट्रिय बजारय् लुँ प्रतिऔंश ७ डलरं थहां वनाः २ हजार ३४२ डलर थ्यंगु खः । थ्व स्वयां न्ह्यः २ हजार ३३५ डलर थ्यनाच्वंगु खः । लुँया भाः थहां वनेवं व्यापारीत मारय् लाइगु खँ नं वय्कलं धयादीगु दु । लुँया भाः निरन्तर थहां वनाः बजाः म्हो जुयाच्वंगु इलय् अझ भाः थहां वन धाःसा व्यवसायीत थप मारय् लाइगु खँ वय्कलं धयादीगु दु ।
उकथं हे नेपाल सुनचाँदी व्यवसायी संघया अध्यक्ष माणिकरत्न शाक्यं नं लुँया भाः थहां वनाः नेपालय् परम्परागत रुपं ज्या यानाच्वंपिं मारय् लायेफइगु खँ धयादीगु दु । वय्कलं आः थहां वंगु भाः कथं लुँ तोलां २८ हजार तका कर पुलेमालाच्वंगु दुसा तस्करी याइपिंसं तप्यंक हइबलय् तोलां हे २८ हजार तका बचे जुइगु जुयाः न्ह्याथे यानाः नं लुँ तस्करीइ लगे जुइगु खँ धयादिल, ‘लुँ तोलां २८ हजार भन्सार बचे जुइबलय् आः तस्करी याइपिं ज्यान हे पानाः नं तस्करी यायेत न्ह्यचिली ।’
उकथं हे वय्कलं आः तक नं सरकारं लुँ आयातय् तयातःगु मार्जिन मचीकूगु गलत जूगु खँ कनादिल । आःया अवस्थाय् लुँ आयात यायेगुली मार्जिन तयेमाःगु आवश्यकता मदु धासें वय्कलं धयादी, ‘छखे लुँया भाः थहां वनाः लुँ न्याइपिं हे मदु, मेखे सरकारं तयातःगु लुँ आयातया मार्जिन नं चीकूगु मदु ।’
सरकारं वार्षिक ७३०० केजी लुँ आयात यायेगु नीति नालातःगु दु । अथे धइगु न्हिं २० किलो खः । तर थुगुसी भाः थहां वनाः ३ हजार केजी हे लुँ आयात मजू । थज्याःगु इलय् नं सरकारं लुँ आयात यायेत तयातःगु मार्जिन अनावश्यक धकाः पुष्टि जूगु खँ वय्कलं कनादिल ।
LEAVE YOUR COMMENTS