मेसीं पिएसजीपाखें डेब्यु कासा म्हितल
एजेन्सी÷अर्जेन्टिनाया स्टार कासामि लियोनल मेसीं फ्रेन्च क्लब पिएसजीपाखें डेब्यु कासा म्हितूगु दु । आइतवाः चान्हय् रेइम्सलिसे जूगु कासाय् मेसीं पिएसजीया निंतिं न्हापांगु कासा म्हितूगु खः । मेसी कासाया ६६ औं मिनेटय् ३० नम्बर जर्सी फिना ब्राजिलया स्टार कासामि नेयमारया थासय् मैदानय् दुहां वःगु खः ।
मेसी मैदानय् दुहां वयेवं कासा स्वःवयाच्वपिं दक्वं दर्शकतय्सं मेसीया सम्मान यासें दनाः लापा थाःगु खः । रेइम्सया मैदानय् कासा जूगु खःसां दर्शक धाःसा पिएसजीया कासामि मेसीयात स्वयेत रंगलशालाय् वःगु खः । २१ हजार क्षमता दुगु रंगशालाय् मेसी कासा म्हितीगु जुइवं पूवंक हे जाःगु खः ।
कासाय् पिएसजीं रेइम्सयात २–० गोल बुकल । कासाया निगुलिं गोल फ्रान्सया स्टार कासामि केलियन एमबाप्पें याःगु खः । एमबाप्पें कासाया १६ औं व ६३ औं मिनेटय् गोल याःगु खः ।
पिएसजीया प्रशिक्षक मौरिसिया पोचेटिनों मेसी फर्मय् मदुनिगु व फर्मय् वयेत निवाःया ई मालीगु जूसां मेसी डेब्यु याःगुलिं थः तसकं लय्तायागु धाःगु दु । निगू दशक तक स्पेनिस क्लब बार्सिलोनां म्हितूम्ह मेसीया करियरय् पिएसजी निगूगु क्लब खः।
LEAVE YOUR COMMENTS