‘राष्ट्रपतिया शाही ठाँट मवंनि’
येँ – थुगुसी मोहनिबलय् राष्ट्रपति विद्यादेवी भण्डारीं शितल निवासय् सिन्हः तिकेगु झ्वलय् सार्वजनिक जूगु छपाः किपां यानाः राष्ट्रपति लिसें राष्ट्रपति भवनया सम्पूर्ण सल्लाहकार व व्यवस्थापन पक्षया आलोचना जूगु दु ।
राष्ट्रपति भण्डारीया निक्वःगु कार्यकालय् वय्कःयात हे राष्ट्रपति पदया सपथ ग्रहण याकादीम्ह पुलांम्ह प्रधान न्यायाधीश गोपालप्रसाद पराजुलीं सिन्हः तीगु लागिं राष्ट्रपतिया न्ह्यःने पुलिं चुयाच्वंगु किपा सार्वजनिक जुइवं राष्ट्रपति भण्डारीं सामन्ती संस्कार क्यन धकाः आलोचना सुरु जूगु खः ।
वय्कःया थ्व पहःयात कयाः नेकपाया केन्द्रीय दुजः लिसें पत्रकार सूर्य थापां सामाजिक सञ्जालय् हे स्टाटस हे च्वयाः राष्ट्रपति भवनया सल्लाहकारतय् लापर्वाहीं यानाः थज्याःगु अवस्था वःगु खः धकाः आलोचना यानादीगु दु ।
सामाजिक सञ्जालय् थ्व किपा भाइरल जूगु दुसा उकिया क्वय् अप्वःसां ‘महारानी विद्यादेवी भण्डारी’ धकाः च्वयाः देशय् गणतन्त्र वयेधुंकाः नं शाही ठाँट मवंनि धकाः आलोचना याना हःगु खः ।
उखे प्रधानमन्त्री केपी ओलीं नं न्हापा गबलें मजूनिगु परम्परा सुरु यानाः वालुवाटारय् न्यान्हु तक सिन्हः तिकेगु कार्यक्रम सार्वजनिक याःगु दु । थुकिया नं आलोचना जुइवं वय्कलं सुथय् छगू ई जक सिन्हः तिकेगु जुइ धकाः मेगु सुचं सार्वजनिक याःगु खः ।
LEAVE YOUR COMMENTS