‘सभामुखं एमसीसी पनेदइमखु’ – ओली

येँ – नेकपा एमालेया अध्यक्ष केपी शर्मा ओलीं अमेरिकी सहयोग परियोजना मिलेनियम च्यालेन्ज कम्प्याक्ट (एमसीसी) संसदय् पेश यायेत सभामुख अग्निप्रसाद सापकोटां पने दइमखु धयादीगु दु । एमालें ग्वसाः ग्वःगु स्थानीय तह निर्वाचन लक्षित प्रशिक्षण ज्याझ्वःया उलेज्या यासें अध्यक्ष ओलीं उगु खँ धयादीगु खः ।

वय्कलं सभामुखं एमसीसी सम्झौता टेबुल याके मखु धायेगु सभामुखया अधिकार स्वयां पिनेया खँ खः धासें वय्कलं धयादिल, ‘संसदय् न्ह्यमब्वसे पने धायेगु अधिकार सभामुखयात मदु । थ्व वय्कःया कर्तव्य नं मखु, वय्कलं अनधिकृत ढंगं ज्या याये दइमखु ।’

थ्व स्वयां न्ह्यः सभामुख कृष्णबहादुर महरां नं एमसीसी अनधिकृत रुपं पनाबिउगु न्ह्यथँसें अध्यक्ष ओलीं एमसीसी बारे संसदं हे निर्णय यायेमाः धयादिल । ‘संसदं छु याइ थःगु हे थासय् दु, तर संसदयात उगु अधिकार मबीगु खँ अनाधिकृत खः,’ वय्कलं धयादीगु दु ।

अध्यक्ष ओलीं एमसीसीया विषयं देय्यात गम्भीर भूराजनीतिक द्वन्द्वय् फँसे याःगु धासें सत्तारुढ गठबन्धनया नेतातय्सं बिस्कं एमसीसीबारे नेपाःमि जनतायात बिस्कं बिस्कं खँ तयेगु यानाच्वंगु धासें उकिया आलोचना नं यानादीगु दु । वय्कलं धयादिल, ‘एमसीसीया अधिकारीत लिसे प्यला न्यालाया ई बिल धाःसा पास याये धकाः किटानी खँ ल्हाइगु, तर आः वयाः पास याये हे मजिउ धाइगु । सत्ता गठबन्धनया हे नेता मध्ये छम्हेस्यां पक्षय् न्ववाइ, मेम्हेस्यां विपक्षय् न्ववाइ, थ्व तसकं गैर जिम्मेवारी व धोखापूर्ण खँ खः ।’

उकथं हे नेपाली कांग्रेसया प्रवक्ता डा. प्रकाशशरण महतं नं सभामुख अग्निप्रसाद सापकोटां एमसीसी सम्झौता संसदय् न्ह्यब्वयेमाःगु खँ धयादीगु दु । नेपाल विद्यार्थी संघं ग्वसाः ग्वःगु ज्याझ्वलय् न्ववायेगु झ्वलय् वय्कलं प्रस्ताव संसद बैठकय् न्ह्यब्वयेगु सभामुखया दायित्व जूगु खँ धयादीगु दु ।

प्रवक्ता महतं धयादिल, ‘सभामुखं सदनय् प्रक्रिया न्ह्याकेमाः, सरकारं दर्ता याःगु प्रस्ताव सदनय् न्ह्यःने यंकेगु दायित्व सभामुखया खः । सदनय् बुँदागत सहलह जुइ, अले दुरुया दुरु लः या लः छुटे जुइ ।’ एमसीसीया बारे भ्रम न्यंकेगु ज्या जुयाच्वंगु धासें वय्कलं एमसीसीया बारे ब्वलनाच्वंगु भ्रम एमसीसीं हे स्पष्ट यायेधुंकूगु खँ नं धयादीगु दु ।

यथास्थितिइ समर्थन यायेफइमखु ः नेपाल

येँ – नेकपा एकीकृत समाजवादी पार्टीया अध्यक्ष लिसें पुलांम्ह प्रधानमन्त्री माधव नेपालं यथास्थितिइ एमसीसीया समर्थन याये मफइगु खँ धयादीगु दु । म्हिगः विरगञ्जय् समाजवादी प्रेस संगठन पर्सां ग्वसाः ग्वःगु पत्रकार सम्मेलनय् न्ववासें वय्कलं एमसीसी बारे जनतायात स्पष्ट यायेमाःगु हाथ्या दुगु खँ धयादीगु दु ।

पत्रकार सम्मेलनय् वय्कलं धयादिल, ‘एमसीसी बारे नेपाःमि जनता व राजनीतिक दल विभाजित दु । अथे जुयाः एमसीसीया बारे क्लियरिफिकेसन माः । गुलिखे खँ मिले यायेमाःगु दु । जनमत एमसीसीया विरुद्धय् दु, जनमतयात नं गुकथं आश्वस्त दयेके फइ, थ्व नं छगू तःधंगु हाथ्याः दु ।’

पत्रकार सम्मेलनया झ्वलय् वय्कलं एमसीसीबारे ब्वलनाच्वंगु न्हय्गू न्ह्यसलय् स्पष्ट जुइमाःगु खँ नं धयादीगु दु । वय्कलं एमसीसी इन्डो–प्यासेफिक रणनीतिया अंग खः कि मखु स्पष्ट जुइमाःगु, थ्व अमेरिकीया सुरक्षा रणनीति अन्तर्गत ला कि मलाः ? सैन्य संलग्नता दु कि मदु ? ट्रान्समिसन लाइन क्वय्या भूभाग वा सतक दयेकेबलय् नेपाःया सार्वभौम अधिकार दइ कि मदइ लगायत थीथी न्ह्यसःया लिसः माःगु खँ धयादीगु खः ।