मुख्यमन्त्रीतय्त समर्थन मदु

येँ – नेकपा (एमाले) तज्यानाः नीस्वंगु नेकपा (एकीकृत समाजवादी) या अध्यक्ष माधव नेपालं बागमति प्रदेशया मुख्यमन्त्री अष्टलक्ष्मी शाक्य व प्रदेश नं. १ या नवनियुक्त मुख्यमन्त्री भीम आचार्ययात आःया अवस्थाय् थःगु पार्टीपाखें समर्थन याये मफइगु सन्देश बियादीगु दु ।

निर्वाचन आयोगपाखें दल दर्ताया दसिपौ कायेवं म्हिगः ग्वसाः ग्वःगु पत्रकार सम्मेलनय् न्ववासें अध्यक्ष नेपालं अज्याःगु सन्देश बियादीगु खः । पत्रकारतय्सं बागमति प्रदेश व १ नम्बर प्रदेशया मुख्यमन्त्रीपिंत समर्थन यानादीला धकाः न्यंगु न्ह्यसःया लिसः बिसें अध्यक्ष नेपालं वय्कःपिं पार्टीइ दुहां वल धाःसा सहकार्य याये फइ, दुहां मवल धाःसा समर्थन बीगु सम्भावना मदु धयादीगु खः । वय्कलं धयादिल, ‘थुगु पार्टीइ च्वंत्तले ठीक जुइ, विरोधी पार्टीइ च्वं वन धाःसा सहकार्य सम्भव मदु, शत्रुतापूर्ण ढंगं न्ह्याइपिं लिसे एकता व सहकार्य सम्भव मदु, सहकार्यया लँपुइ वनेगु खःसा जिपिं सहकार्य यायेत तयार दु । ’

ताः ई तक एमाले दुने ब्वलंगु विवादया इलय् शाक्य व आचार्य निम्हं नेपालया पक्षय् दुगु खः तर आः धाःसा वय्कःपिं निम्हं ओली पक्षय् वंगु दु । थ्व निगुलिं प्रदेशय् एमालेया यकःति सरकार दुसा एमालेया छुं प्रदेश सांसदत माधव नेपालया पार्टीइ वन धाःसा निगुलिं प्रदेशया सरकार अल्पमतय् लाइगु निश्चित दु ।
शाक्यं वंगु छुं न्हि न्ह्यः जक मुख्यमन्त्री नियुक्त जुयादीगु खःसा आचार्य म्हिगः प्रदेशया मुख्यमन्त्री जुयादीगु दु । निवर्तमान मुख्यमन्त्री शेरधन राईं राजीनामा बियाः आचार्ययात मुख्यमन्त्री दयेकूगु खः।

राजनीतिक दल विभाजन सम्बन्धी अध्यादेशय् यानातःगु व्यवस्था कथं गुगुं नं पार्टी तज्यानाः न्हूगु दल गठन जुल धाःसा पुलांगु पार्टीया स्थानीय तह व प्रदेश सभाया जनप्रतिनिधित तकं नीछन्हुया दुने न्हूगु पार्टीइ वने फइ । उलि ईया दुने न्हूगु दल ल्यल धाःसा उमित राजनीतिक दल त्याग सम्बन्धी व्यवस्था कथं कारवाही याये दइमखु ।

नेपालभाषा टाइम्स

च्वमिया मेमेगु

• थुकथं न्ह्यात बोडेया म्ये प्वाः खनीगु जात्रा
• बिस्काःया झ्वलय् थिमिइ ‘सुथसिया याः’ न्यायेकल
• छायादेवीया जग्गा पुखू प्रमाणित
• पाहाँचःह्रे क्वचाल
• ताेखाय् बिस्काःया निंतिं यःसिं थन