चोभारय् आदिवासी दमन याःगुलिं विश्व बैंक लिचिलीगु संकेत

येँ- चोभारय् दयेकाच्वंगु सुख्खा बन्दरगाहय् विश्व बैंकं लगानी मयाइगु संकेत खने दया वःगु दु । विश्व बैंकं आः थःपिंसं लगानी यायेगु क्षेत्रय् स्थानीय आदिवासीया अधिकारया सम्मान यायेमाः धइगु नीति नालेवं उकिया लिच्वः आदिवासी चोभाःया सुख्खा बन्दरगाहय् तक लायेफुगु खँ धाःगु दु ।

चोभारय् दयेकाच्वंगु सुख्खा बन्दरगाहया विषयय् चोभार संरक्षण समितिं थ्व स्वयां न्ह्यः विश्व बैंकयात ज्ञापन पौ बिउगु खःसा उगु इलय् स्थानीयवासिन्दाया मागयात कयाः विश्व बैंक सकारात्मक जूगु खः ।

विश्व बैंकं सनं २०१८ स छगू नीति पारित यानाः आदिवासीया सम्मान मयाइगु राष्ट्रय् थःपिंसं लगानी मयायेगु खँ धाःगु खः । विश्व बैंकया न्हूगु वातावरण व सामाजिक नीति–२०१८ कथं विश्व बैंकयाके ध्यबा त्याय् काइपिं देसय् यदि आदिवासीत दुसा अनिवार्य रुपं उमिगु आदिवासी अधिकारयात सम्मान यायेमाः ।

थुकिं आदिवासीया भूमि व स्रोत सम्बन्धी अधिकार, परामर्श व सहभागिताया अधिकार लिसें अग्रिम स्वतन्त्र मञ्जुरीया अधिकार पालना व विश्व बैंकया लगानीपाखें प्राप्त जुइगु लाभ सुनिश्चित यायेमाः । सूत्रया कथं चोभारय् च्वंगु सुख्खा बन्दरगाह दयेकेगु झ्वलय् थीथी कानुनया पालना मयाःगु, सर्वोच्च अदालत सहित थीथी न्यायिक निकायया आदेशया अवहेलना याःगु, पीडितया जायज मागयात सुनुवाई मयाःगुलिं विश्व बैंकं बीगु त्यासा बन्द जुइ फइगु खँ धाःगु दु ।
विश्व बैंकं लगानी याना वयाच्वंगु आपालं देशय् आदि– वासीया अधिकार हनन जूगुलिं उमिगु अधिकार रक्षा यायेगु नीति विश्व बैंकं नालाकायेधुंकाः आः चोभाःया हकय् नं उगु प्रावधान लागू जुइ फइगु जूगुलिं थःपिंसं लगानी यायेगु धकाः यानाच्वंगु तयारीपाखें विश्व बैंक लिचिले फइगु सम्भावना अप्वया वनाच्वंगु खँ सूत्रं धाःगु दु ।

चोभार संरक्षण समितिं विश्व बैंकयात ज्ञापन पौ बीगु झ्वलय् सर्वोच्च अदालतं स्थानीय जनताया अधिग्रहण जूगु जग्गा मेगु प्रयोजनय् छ्यले मदइगु व उगु जग्गा सम्बन्धित जग्गाथुवाःयात हे लित बीमाःगु निर्णय लिसें हेटौंडा सिमेन्ट कारखाना व सरकारया दथुइ जूगु सम्झौता पौ आदि नं विश्व बैंकया नेपाः ज्याकूयात लःल्हाःगु खः ।

चोभार संरक्षण समितिं म्हीग नं नेपाल इन्टरमोडेल यातायात विकास समितिया साइट अफिसय् जग्गा थःपिंत लित बीमाःगु दावी सहित निवेदन दर्ता याःगु दु । नेपाल इन्टर मोडेल यातायात विकास समितिं वंगु वैशाख ९ गते गोरखापत्रय् सुचं पिथँसें थःपिनिगु अधिकार लगे जूगु खःसा उकिया प्रमाण सहित दावी याः वा धाःगु खः ।