कोरोना संक्रमणय् नेपाःया दकलय् जोखिम थाय्या रिपोर्ट थौं वइगु

येँ– भारतं तःधंगु ल्याखय् नेपाः दुहांवःपिं, कोरोना भाइरसया संक्रमण उच्च जोखिम दुपिं धयातःपिनि भाइरसया संक्रमणया रिपोर्ट थौं वयेत्यंगु दु । नेपाःया पश्चिम पहाडया प्यंगू जिल्लां उमिगु स्वाब संकलन यानाः सेनाया हेलिकप्टर व स्काई ट्रकं म्हिगः येँय् परीक्षणया निंतिं हःगु खः । स्वास्थ्य अधिकारीतय्सं थुमिगु लिच्वः शनिवाः दुने वइगु खँ धाःगु दु ।

नेपाली सेनाया हेलिकप्टरं ७०० म्हेसियागु नमूना येँ हःगु खः । सुदूरपश्चिमया निगू व कर्णाली प्रदेशया निगू जिल्लां थ्व नमूना संकलन यानाहःगु खः । स्वास्थ्य मन्त्रालयया प्रवक्ता डा. विकास देवकोटां कर्णाली प्रदेशं ८५ म्हेसिया व सुदूर पश्चिमया डडेल्धुरां १९९ म्ह व बैतडीं ४२५ म्हेसिया नमूना म्हिगः थ्यंकःवःगु खँ धयादीगु दु ।

भारतं लिहां वःपिं यक्व दुगु जिल्ला जूगुलिं थुगु थासं नमूना संकलन याःगु खः । राष्ट्रिय जनस्वास्थ्य प्रयोगशालां थुमिगु नमूना परीक्षण सुरु जुइधुंकूगु व शनिवाः हे रिपोर्ट वइगु खँ धाःगु दु ।

स्वास्थ्य अधिकारीतय्सं थ्व थाय्या रिपोर्टयात तसकं चिउताः बियाः पियाच्वंगु दु । छम्ह स्वास्थ्य अधिकारीं थ्व थाय्या रिपोर्ट स्वयाः हे जक सम्भावित जोखिमया दायरा अनुमान यायेगु यक्वमात्राय् ग्वाहालि जुइगु खँ धयादीगु दु ।