कार्तिक १३ गते नं किजापुजाया बिदा बीगु बचं
येँ – प्रधानमन्त्री केपी शर्मा ओलीं थ्वहे वइगु कार्तिक १३ गते किजापुजाया लागिं सार्वजनिक बिदा बीगु खँ कनादीगु दु । थ्वहे विषयय् थौं सुथय् थःथाय् वःगु नेकपाया येँ जिल्लाया जनप्रतिनिधिपिनि प्रतिनिधि मण्डललिसे खँ ल्हासें वय्कलं कार्तिक १३ गते नं किजापुजा यायेगु लागिं मन्त्रिपरिषद्पाखें निर्णय यासें सार्वजनिक बिदा बीगु खँ कनादीगु खः ।
येँया संघीय सांसद कृष्णगोपाल श्रेष्ठया नेतृत्वय् वंगु प्रतिनिधि मण्डलं प्रम ओलीयात थुगुसी तिथि विवादया कारणं कार्तिक १३ गते किजापुजा न्यायेकेमाःपिं नेवाःतय्त व्यावहारिक समस्या वःगु जुयाः १३ गते कुन्हु नं सार्वजनिक बिदा बीमाःगु बारे कनादीगु खः ।
वय्कःपिनि खँ न्यनेधुंकाःलि प्रम ओलीं सुयां नं संस्कृतियात प्रतिकुल लिच्वः लाकेगु सरकारया नीति मखु, सकसितं थःथःगु संस्कृति व संस्कार हनेगु समान अधिकार दु धासें कार्तिक १३ गते नं बिदाया लागिं विधिवत् निर्णय याकेगु बचं बियादीगु खः ।
लिसें उगु इलय् प्रम ओलीं नेपाल संवत् नेपाःया राष्ट्रिय संवत् खः, छुं जाति विशेषया संवत् मखु धासें थुकिया न्हूदँ सकल नेपाःमितय्सं उल्लासपूर्वक न्यायेकेमाःगु बिचाः नं तयादीगु खः ।
प्रतिनिधि मण्डलय् सांसद श्रेष्ठ लिसें प्रदेश सभाया सांसदपिं डा. अजयक्रान्ति शाक्य, राजेश शाक्य व येँ वडा २२ या अध्यक्ष चिनिकाजी महर्जन नं दुथ्याःगु खः ।
लुमंकेबहः जू, प्रदेश नं. ३ य् निर्वाचित येँया सांसद डा. अजयक्रान्ति शाक्यं कार्तिक १३ गते सार्वजनिक बिदा बीमाः धासें सरकारयात छुं ई न्ह्यः सार्वजनिक रुपं इनाप यानादीगु खः ।
LEAVE YOUR COMMENTS