सतक तब्या यायेत वटुक भैरवय् डोजर
- नेपालभाषा टाइम्स
- ११३८ अनलागा नवमी
- किपा-कृष्ण मानन्धरया फेसबुक
यल – लगं ख्यलं सातदोबाटो तक सडक विस्तार यायेगु झ्वलय् थनया वटुक भैरव (मतिक्वः भैलः) द्यःया देगः जःखः दनातःगु पःखाः डोजरं थुना बिउगु दु । उपत्यका नगर विकास प्राधिकरणं अन डोजर हयाः पखाः थुनेगु ज्या यायेवं स्थानीय जनता सतकय् कुहां वयाः उकिया विरोध याःगु खः ।
डोजर हयाः पःखाः थुनेगु तयारी यायेवं स्थानीय जनता सतकय् कुहां वयाः पुलांगु सम्पदा ल्यंकेमाः धासें डोजरयात पं वःगु खः । तर डोजर नापं वःपिं प्रहरीं जनतायात बल प्रयोग यानाः अनं हटे यासें पःखाः सामान्य क्षति याना थकूगु दु ।
प्राधिकरणं उगु सडक २२ मिटर यायेगु निंतिं देगःया कम्पाउन्ड थुनेत्यंगु खः । सम्पदायात स्यंकाः लँ तब्या यायेगु ज्या गलत धासें बरु देगःया न्ह्यःने च्वंगु सेनाया पम्प तयातःगु थासय् सतक तब्या यानाः यंकेमाःगु खँय् स्थानीय जनतां बः बिउगु खः । तर प्राधिकरणया अधिकारीतय्सं धाःसा देगः थुनेगु मखु उकिया छुं भचा भाग जक सतकय् लाइ धासें मापदण्ड कथं थुनेगु धाःगु खः ।
स्थानीय जनतां मापदण्ड स्वयां पुलांगु देगः थुनेगु ज्या उचित मजू धासें देगःया छुं नं ब्व थीगु धइगु सम्पदायात नष्ट यायेगु कुतः खः धकाः विरोध याःगु खः । अथेहे स्थानीय जनतां सतक विस्तार विरुद्ध सर्वोच्च अदालतं परमादेश जारी यानातःगु खँ धासें प्राधिकरणं प्रहरीयात न्ह्यःने तयाः देगःया कमाउन्ड थुनेगु धइगु अदालतया आदेशयात तकं हाथ्या बिउगु खः धकाः नं दावी याःगु दु ।
सडक विस्तार पीडित संघया दुजः सुरज महर्जनं आः थःपिंसं सहलह यानाः थुकिया विरुद्ध आन्दोलन यायेगु तयारी यानाच्वनागु खँ ‘नेपालभाषा टाइम्स’ यात कनादिल । वय्कलं सडक विस्तारया झ्वलय् लगं ख्यलं सातदोबाटो तक नीखा ति छेँ थुनेधुंकूगु जानकारी बिसें थुनेधुंकूगु छेँया क्षतिपूर्ति आः तक नं मबिउनिगु खँ नं कनादिल । अझ नं अन छेँ थुनेगु ज्या ल्यं दनिगु खँ कनादिसें क्षतिपूर्तिया खँ मिले मजुयाः स्थानीय जनतां छेँ थुनेगु ज्या थातिं तयातःगु जानकारी नं वय्कलं बियादिल ।
मेखे उगु लागाया वडाध्यक्ष सुदर्शन मिश्रं धाःसा वटुक भैरवया कपाउण्ड थुंगु जानकारी थःत मदु धासें थःपिं दुबलय् तक थुनेगु ज्या मजूगु खँ कनादिल । थः नगर परिषद्या बैठकय् वयेधुंकाः छु यात थम्हं मसिउगु खँ नं वय्कलं कनादिल । वय्कलं स्थानीय जनतायात छेँ थुने न्ह्यः उचित क्षतिपूर्ति बीमाः धकाः थम्हं प्राधिकरणयात दबाब बियाच्वनागु खँ नं कनादिल ।
LEAVE YOUR COMMENTS