तुकुचाय् बालेनया गलत व्याख्या !

येँ (नेपालभाषा टाइम्स)- येँ मनपाया बालेन साहं म्हिगः सामाजिक सञ्जालय् छगू स्टाटस च्वसें यलया उच्च अदालतं तुकुचा खुसियात त्वपुना तये मजिउ, उकियात उले हे माः धकाः फैसला याःगुलिं थःपिं विजयी जुल धकाः दावी यानादीगु खनाः सर्वसाधारण अजू चाःगु दु ।

विज्ञतय्सं धाः कथं उच्च अदालतं वास्तवय् तुकुचा उले हे माः धकाः फैसला याःगु मखुसें उले माःगु खः कि मखु अध्ययन यानाः प्रदेश सरकारलिसे जानाः ज्या या धकाः फैसला याःगु खः । थ्व ज्या मयासे अन च्वंपिं स्थानीय मनूतय् छेँबुँ हड्पे यायेगु पाय्छि मखु धकाः नं फैसलाय् धयातःगु दु ।

थ्वहे झ्वलय् येँ मनपां सतक सिथय् पार्किङ याके मबीवं ट्याक्सी व्यवसायीत आन्दोलित जूगु दु । व्यवसायीतय्सं थःपिसं हे ‘पार्किङ’ च्वयातःगु बोर्ड तयाः ट्याक्सी पार्किङ यासें विरोध प्वंकूगु खः । उकियात चीकेत स्वःगु इलय् छुं ई तनाव नं ब्वलंगु खः । ट्राफिक प्रहरी लिसें नेपाल प्रहरीं बल छ्यलेत स्वयेवं म्हिगः मैतीदेवी दुवातय् घौछि धइथें लँ बन्द जूगु खः । व्यवसायीपिसं बेथां ट्याक्सी दिकाः सतक अवरुद्ध याःगु खः ।