सिजनया इलय् लुँया अभाव ब्लाय्कं लुँ न्यायेमाःगु अवस्था
येँ – अन्तर्राष्ट्रिय बजारय् लुँया भाः कुहां वयाच्वंगु दुसां नेपालय् लुँ न्यायेगु मदयाः लुँ व्यापारीपिंत समस्या जुयाच्वंगु दु । इहिपाया सिजनय् लुँया माग अप्वया वनाच्वंगु दुसा बजारय् धाःसा माक्व लुँ मदयेवं लुँ पसल्यातय्सं बजाः भाः स्वयां अप्वः पुलाः लुँ न्याये मालाच्वंगु दु ।
बजारय् लुँया माग अप्वया वनेवं तोलां न्यासः तका निसें निद्वः व न्यासः तका तक अप्वः भाः पुलेमाःगु खँ नां कने मयःम्ह छम्ह लुँ पसल्यां ‘नेपालभाषा टाइम्स’ यात कनादीगु दु ।
लुँ वहः व्यवसायी महासंघया पुलांम्ह अध्यक्ष तेजरत्न शाक्यया कथं नं ब्याहाया सिजनया इलय् बजारय् लुँ माग अप्वःगुलिं नं लुँया अभाव जूगु खँ कनादीगु दु ।
वय्कःया कथं बैंकतय्सं इलय् हे लुँ आयात मयाःगुलिं यानाः नं बजारय् लुँया अभाव जूगु खः । मेखे सरकारं २० किलो स्वयां अप्वः लुँ आयात यायेगुलिं प्रतिबन्ध तयातःगुलिं यानाः नं बजारय् लुँया अभाव जूगु खः ।
उकथं हे अमेरिका व रुसया दथुइ ब्वलनाच्वंगु द्वन्दया कारणं यानाः उकिया छु भचा लिच्वः बजारय् लानाच्वंगु खँ नं अध्यक्ष शाक्यं कनादीगु दु ।
अन्तर्राष्ट्रिय बजारय् लुँया भाः थहां कुहां जुयाच्वंगुलिं यानाः बैकतय्सं लुँ आयात यायेगुलिं लिबाकाच्वंगु खः । गुकिं यानाः नेपालय् सिजनया इल्य् लुँया अभाव जुयाच्वंगु विश्लेषण
वय्कःया दु ।
LEAVE YOUR COMMENTS