लुँ तोलां १ लाख ६ हजार ३०० थ्यनाः न्हूगु कीर्तिमान

येँ (नेपालभाषा टाइम्स)÷ नेपाःया बजारय् लुँया भावं न्हूगु कीर्तिमान कायम याःगु दु । म्हिगः नेपालय् लुँ तोलां १ लाख ६ हजार ३०० तका थ्यंगु दु । थ्व स्वयां न्ह्यः २०७८ फागुन २५ गते लुँ तोलां १ लाख ५ हजार ५०० तका कायम जुयाः न्हूगु रेकर्ड तःगु खः ।

लुँया भाः न्हिथं थहां वनाः १ लाख १० हजार तक थ्यने फइगु अनुमान नेपाल सुनचाँदी व्यवसायी संघया पुलांम्ह अध्यक्ष लिसें बजार विश्लेषक तेजरत्न शाक्यं यानादीगु दु । अन्तर्राष्ट्रिय बजारय् लुँ प्रतिऔंश २ हजार डलर थ्यन धाःसा नेपालय् १ लाख १० हजार थ्यनी ।

अन्तर्राष्ट्रिय बजारय् डलरया भाः अवमूल्यन जुयाः नं लुँया भाः थहां वंगु खँ वय्कलं कनादिल । म्हिगः नेपाःया ध्यबा डलर स्वयां छतका व १० पैसा अवमूल्यन जुइवं लुँया भावय् न्हूगु रेकर्ड कायम जूगु खः ।
उकथं हे विश्वया थीथी प्रमुख बैंकतय्सं डलरया सञ्चिती म्हो यानाः लुँयात महत्व बिउगु कारणं यानाः नं लुँया भाः थहां वनाच्वंगु खँ अध्यक्ष शाक्यं कनादिल । अमेरिकाया फेडरल बैंकं न्हापा बिया वयाच्वंगु ब्याजदर अप्वयेकाः ४.५ प्रतिशत थ्यंकेधुंकूगु दुसा थ्वहे वइगु फेब्रुअरी तक ५ प्रतिशत थ्यंकेगु कुतः यानाच्वगुलिं नं उकिया लिच्वः लुँया बजारय् लाःगु खः ।

अन्तर्राष्ट्रिय बजारय् लुँया भाः थहां वनाच्वंसां नेपालय् धाःसा लुँया कारोबार म्हो जूगु दु । माघ महिना विवाहया सिजन जुयाः लुँया माग अप्वयेमाःगु खःसां आः खास हे माग मदयाः लुँया ब्ल्याक मार्केटय् नं भाः कुहां वनाच्वंगु दु । थौंकन्हय् बजाः भाः स्वयां नं ३ हजार तका दंक लुँ न्यायेगु ज्या जुयाच्वंगु दु ।

तर वइगु छुं न्हिं लिपा धाःसा ब्ल्याक मार्केटय् लुँया भाः हाकनं थहां वने फइगु सम्भावना दु । नेपालय् अवैध लुँ दुहां वयाच्वंगु मदु धायेगु यानाच्वंसां नं बजारय् धाःसा अवैध लुँया कारोबार यक्व जुयाच्वंगु दु । विशेष यानाः नेपालय् चिनियाँ बजारं अवैध लुँ वयेगु यानाच्वंगु दु ।

आः वइगु छुं न्हि लिपा चीनय् न्हूदँया बिदा जुइगु जुयाः उकिया लिच्वः नेपाःया लुँ ब्ल्याक मार्केटय् लायेफु । विदाया इलय् चिनियाँत ताः ई तक न्हूदँ हनेगुली व्यस्त जुइगुलिं नेपालय् लुँया अभाव जुइ । वंगु मसिर महिनाय् नं नेपाःया लुँया ब्ल्याक मार्केटय् लुँ तोलां स्वद्वः निसें न्याद्वः तक अप्वः पुलाः न्यायेमाःगु खँ व्यापारीतय्सं धाःगु खः ।

सम्बन्धित बुखँ

LEAVE YOUR COMMENTS