थप चिनिया सामानय् अमेरिकी कर

येँ – अमेरिकां चीन लिसेया व्यापार युद्धयात अझ तच्वयेकेगु संकेत बिसें २ खर्ब अमेरिकी डलर बराबरया चिनियाँ सामानय् कर अप्वयेकेगु घोषणा याःगु दु । अमेरिकां चीनय् उत्पादन जुइगु न्याद्वःगू सामानय् कर अप्वयेकेत्यंगु खः । थ्व स्वयां न्ह्यः चीनं अमेरिकी कर अप्वयेकूगु खँय् असन्तुष्टि प्वंकूसें उकिया बदला कायेगु ख्याच्वः बिया वयाच्वंगु खः ।

चीनय् उत्पादन जुइगु झोला, कापः लगायत सामानय् अमेरिकां कर अप्वयेकेगु घोषणा याःगु खः । तर स्मार्ट वाच व तजाःगु कुर्सी थेंज्याःगु सामानय् कर छुट बियातःगु दु । अमेरिकी राष्ट्रपति डोनाल्ड ट्रम्पं अमेरिकाया न्हूगु कर नीतियात चीनं प्रतिकार यात धाःसा उकियात अझ अप्वयेकाः २० प्रतिशत थ्यंकेगु ख्याच्वः बिउगु दु ।

लिपांगु इलय् अप्वयेकूगु कर चिनिया सामानय् लगे याःगु दकलय् अप्वः खः । न्हूगु कर वइगु वालंनिसें लागू जुइगु खँ धाःगु दु ।राष्ट्रपति ट्रम्पं न्हूगु करं अमेरिकाया कोषय् अप्वः ध्यबा दुहां वइगु खँ धाःगु दु । राष्ट्रपति ट्रम्पं उकिया लिसें थप २ खर्ब ६० अर्ब डलर बराबरया चिनियाँ सामान आयातय् कर लगे यायेगु ख्याच्वः बिउगु दु ।

ट्रम्पं बेइजिङयात असमान व्यापारिक अभ्यासयात हिलेत आपालं मौका बियागु खँ धाःगु दु । लिसें ट्रम्पं देय्या अर्थतन्त्र बचे यायेगु जिम्मा थःगु ब्वहलय् वःगु खँ धाःगु दु ।अमेरिकाया लिपांगु घोषण लिसें थ्यंमथ्यं २ खर्ब ५० अर्ब डलर बराबरया चिनियाँ सामानय् अमेरिकाय् कर लगे जुइगु जूगु दु ।

थ्व स्वयां न्ह्यः चीनं ५० अर्ब डलर बराबरया अमेरिकी सामानय् कर लगे याःगु खः । व्यापार युद्ध पनेगु निंतिं वंगु मे महिनाय् वार्ता जूगु खःसां नं उगु वार्ता सफल धाःसा जुइमफुत ।