रुसं डिसेम्बरपाखे लय् ५० लाख मात्रा भ्याक्सिन उत्पादन याइगु

एजेन्सी – रुसी न्यू एजेन्सी इन्टरफेसं स्वास्थ्य मन्त्रालययात उद्ढृत यासें रुसं कोरोना विरुद्धया भ्याक्सिनया न्हापांगु ब्याचया उत्पादन क्वचायेकूगु खँ धाःगु दु। अन्तर्राष्ट्रिय समुदायं रुसी भ्याक्सिनयात कयाः शंका प्वंकाच्वंसां रुसं थ्व भ्याक्सिनया उत्पादन सुरु याःगु खः ।

विश्वय् कोरोना विरुद्धया भ्याक्सिन सुनां न्हापां दयेकी धयागु होडया दथुइ रुसं न्हापांखुसी उत्पादन न्हापां सुरु याःगु खः । थ्व भ्याक्सिन अगस्ट महिनाया हे अन्त तकया दुने बजारय् वइगु खँ धाःगु दु। थ्व भ्याक्सिन स्वंगूगु चरणया परीक्षण न्ह्यः हे उत्पादन सुरु याःगु खः ।

इन्टरफेस न्यूज एजेन्सिया कथं मस्कोया गामेलाय इन्ष्टिच्यूटं थ्व भ्याक्सिन वइगु डिसेम्बर-जनवरी महिनाय् लछिया ५० ल्याखया मात्राय् उत्पादन सुरु जुइ । अमेरिका व ब्राजिलं थ्व भ्याक्सिन थःपिंथाय् छ्यलेत अस्वीकार यायेधुंकूगु दु। भारतं धाःसा थ्व भ्याक्सिन छ्यलेगु बारे छुं न्ववाःगु मदुनि । थौंकन्हय् दकलय् अप्वः कोरोना संक्रमण अमेरिका, ब्राजिल व भारतय् जुयाच्वंगु दु ।