ईयुया प्रतिवेदन अस्वीकार

येँ – युरो–पियन युनियनं पिथंगु चुनावया पर्यवेक्षण रिपोर्टयात नेपालं अस्वीकार याःगु दु । चुनावया बारे रिपोर्टय् न्ह्यागु हे खँ च्वयातःगु खःसां खस आर्ययात नं चुनावया कोटाय् दुथ्याका तःगु चीकेमाः धकाः बियातःगु छगू सुझावं यानाः नेपालं युरोपियन युनियनया मुक्कं प्रतिवेदनयात हे अस्वीकार याःगु खः ।

निर्वाचन आयोगं उकुन्हु हे उगु प्रतिवेदनयात स्वीकार याये मफइगु खँ धाःगु खःसा म्हिगः प्रधानमन्त्री केपी ओलीं नं ईयु चुनाव पर्यवेक्षण समितिया उगु रिपोर्टयात स्वीकार मयायेगु संकेत बियादीगु खः । म्हिगः नेपाःया राष्ट्रिय चुनाव पर्यवेक्षण समितिया प्रतिवेदन सार्वजनिक यासें प्रम ओलीं ईयुयात थःगु प्रतिवेदन संशोधन यायेत इनाप यानादीगु खः ।

वय्कलं ज्याझ्वलय् थ्व छगू झ्वः अंग्रेजीं हे सम्बोधन यासें ईयुयात थःगु प्रतिवेदन संशोधन यानादिसँ धकाः इनाप यानादीगु खः । ज्याझ्वलय् न्ववासें वय्कलं नेपालय् इसाई धर्म प्रचार याये मखंगु तमं ईयुं थज्याःगु प्रतिवेदन बिउगु द्वपं समेत अन बियादिल ।

नेपाः छगू स्वतन्त्र व सार्वभौम देय् खः धासें वय्कलं देश गरिब जुल धायेवं थन न्ह्याम्हेस्यां न्ह्यागु याःसां जिउ धकाः मतायेकेत नं ख्याच्वः बियादिल ।
ज्याझ्वलय् निर्वाचन आयोगया प्रमुख आयुक्त अयोधीप्रसाद यादवया न्ह्यःने हे प्रम ओलीं वंगु चुनावय् निर्वाचन आयोगं नं निष्पक्ष भूमिका मम्हितूगु द्वपं बियादिल । चुनावया इलय् मन्त्री थपे याइम्ह सरकारयात छुं मधासे थःपिंत धाःसा चुनावय् प्रचारय् वनाच्वँच्वं हे ‘छितः छाय् कारवाही मयायेगु ?’ धकाः २४ घन्टे पत्र छ्वया हःगु खँ समेत अन न्ह्यथनादिल ।

प्रम ओलीं ईयुयात ख्याच्वः बियाः म्हिगः न्ववानादीगु थ्व धापूयात पुलांम्ह अर्थसचिव रामेश्वर खनाल लगायत खस आर्य समुदायं च्वछायाः सामाजिक सञ्जालय् च्वया हःगु दु ।