स्वनिगलय् खुसिबाः वयाः छेँ डुबान
येँ (नेपालभाषा टाइम्स)÷वंगु सोमवाः चान्हंनिसें मदिक्क वःगु वां स्वनिगःया थीथी खुसि बाः वयाः आपालं लागा डुबानय् लाःगु दु । येँया बागमति खुसि सिथय् च्वंगु सुकुम्बासी वस्ती, यलया शंखमुल पार्क सिथय् दुगु छेँय् खुसिबाः दुहां वंगु खः । उकिं यानाः आपालं धनमाल नोक्सान जूगु दु ।
कागेश्वरी मनोहरा नपा –७ य् चलः वनाः दुना वंगु टहराय् लानाः घाःपाः जूम्ह मिसा मचायात प्रहरीं उद्धार याःगु खः । अथे हे मूलपानीइ अलपत्रय् लानाच्वंपिं निम्हेसित प्रहरीं उद्धार याःगु । सुन्दरीघाट सुकुम्बासी बस्तीइ नं झिंछम्हेसित उद्धार याःगु दु । म्हिगः ख्वपया राम मन्दिरय् खुसिबालय् फसे जूपिं प्यम्हेसित नं प्रहरीं उद्धार याःगु दु ।
स्वनिगःया थीथी थासय् खुसिबाः वयेवं म्हिगः न्हिछि धइथें येँया थीथी थासय् सवारी जाम जूगु दु । येँया परोपकार ताँ क्वय् फसे जूगु छगः गाडीयात डोजरं सालेमाःगु खः । बल्खु तरकारी बजारय् नं खुसि दुहां वनाः तरकारी चुइकूगु खः ।
स्वनिगलय् अझ नं खुसिबाः वयेफु जूगुलिं प्रहरीं थीथी थासय् माइकिङ यानाः खुसि सिथय् छेँ दुपिंत सतर्क जुइत इनाप याःगु खः ।
LEAVE YOUR COMMENTS