सभामुख महरापाखें राजीनामा
न्हूम्ह सभामुख ल्ययेगु ज्या जटिल जुइगु अनुमान
येँ – यौन दुव्र्यवहारया द्वपं लायेवं सभामुख कृष्णबहादुर महरां राजीनामा बियादीगु दुसा वय्कःया थ्व राजीनामां थीथी कथंया अन्यौल नं सिर्जना याना बिउगु दु । महरां ‘द्वपं बारे सत्यतथ्य, निष्पक्ष व स्वतन्त्र छानविनया निंतिं अनुसन्धान यायेत अपुइकेमा धकाः नैतिकताया आधारय् छानविन प्रक्रिया क्वमचाःतलेया निंतिं राजीनामा’ बियादीगु खः ।
तर थ्व राजीनामा शर्त सहितया राजीनामा जूगु धासें उकियात कयाः थीथी कथंया टिप्पणी शुरु जूगु दु । सभामुखया प्रेस सल्लाहकार डिल्ली मल्लं महराया राजीनामा शर्त सहितया खः धासें थःत वःगु गम्भीर द्वपंया अनुसन्धानयात ग्वाहालि यायेत छानविन ईया निंतिं जक राजीनामा बियादीगु खँ कनादीगु दु ।
तर सभामुखं बियादीगु राजीनामा शर्त सहित जुइ मफइगु खँ संविधानविद् विपीन अधिकारीं कनादीगु दु । उकथं हे पुलांम्ह सभामुख लिसें नेकपाया उपनेता सुवास नेम्वाङं नं सभामुखया राजीनामा सशर्त मजुइगु खँ कनादीगु दु । वय्कलं सभामुखं उपसभामुख समक्ष राजीनामा बीवं उगु पद रिक्त जुइ धासें आः महरा सांसद तकं मखयेधुंकूगु खँ कनादीगु दु ।
सभामुख महरायात संसद सचिवालयय् ज्या याइम्ह कर्मचारी रोशनी शाहीयात बलात्कार याःगु धइगु द्वपं लाःगु दु । शाहीं थःत महरां आइतवाः बहनी अय्लाः त्वनाः बलात्कार याःगु धकाः प्रहरी व प्रेसयात जानकारी बीवं थ्व प्रकरण छक्वलं मि थें न्यनावंगु खः ।सभामुख महरायात बला– त्कारया द्वपं लाये धुंकाः वय्कलं म्हिगः हे पार्टीया शीर्ष नेतात लिसे सहलह यानादीगु दु ।
वय्कलं दकलय् न्हापां पार्टीया अध्यक्ष पुष्पकमल दाहालयात छेँय् हे वनाः नापलानादीगु खः । उगु इलय् दाहालं राजीनामा बिउसा बांलाइगु सुझाव बिउगु खःसा वयां लिपा पार्टीया सचिवालय बैठक च्वंगु खः । सचिवालय बैठकं नं महरायात राजीनामा बिउसा बांलाइगु सुझाव बीवं महरां म्हिगः राजीनामा बियादीगु खः ।
तर राजीनामाय् वय्कलं छ्यलादीगु भाषां धाःसा थुकिया वैधतायात कयाः अन्यौल ब्वलंगु खः । थ्वहे झ्वलय् सभामुख महरायात द्वपं बिउम्ह मिसा कर्मचारी शाही डिप्रेसनया ल्वगि जूगु खँ धाःगु दु । थ्व स्वयां स्वला न्ह्यः नं शाहीं विष नयाः आत्महत्या यायेत्यंगु खःसा वयात बानेश्वरय् च्वंगु सिभिल अस्पतालय् यंकाः वासः याकूगु खँ सीदुगु दु ।
थ्वहे झ्वलय् महरां राजीनामा बीधुंकाः आः राज्यया न्यागूगु वरियताय् लानाच्वंगु सभामुख पदय् सु वइ धइगु खँय् नेकपा दुने सहलह शुरु जूगु दु । न्हूगु संविधानय् सभामुख व उपसभामुख छगू हे पार्टीयापिं जुइ मजिउ धइगु प्रावधान दुगुलिं यदि थःगु हे पार्टीयाम्ह सभामुख तयेगु खःसा उपसभामुख शिवमाया तुम्बाहाम्फेयात राजीनामा बीके मालीगु अवस्था वयेफु धाःगु दु ।
महराया राजनीतिक भविष्य समाप्त हे जूगु खत ला ?
येँ – थः छुं विवादय् च्वने मयःम्ह खःसां नं थीथी घटनाक्रमं यानाः इलय् ब्यलय् विवादय् वयाच्वनीम्ह पुलांगु माओवादीया वरिष्ठ नेता कृष्णबहादुर महराया राजनीतिक भविष्य आः थनं लिपा समाप्त हे जूगु खः ला ? राजनीतिक चाकलय् आः थ्व न्ह्यसः नं चर्चाय् दु ।
पुलांगु नेकपा माओवादी दुने कम इलय् हे यक्व प्रगति यानाः उच्च तहलय् थ्यंकः वःम्ह महराया राजनीतिक जीवनय् आःया बलात्कार प्रकरण छगू पूर्ण विराम जुयाः वयेफुगु तर्क याना हःगु दु । वंगु प्यंगू दशक न्ह्यवंनिसें कम्युनिष्ट राजनीतिइ दीम्ह महराया राजनीतिक प्रगति मेपिनि तुलनाय् यक्व तीव्र गतिं न्ह्याः वंगु खनेदु ।
जनयुद्ध न्ह्यः २०४८ सालया चुनावय् हे वय्कः रोल्पां निर्वाचित जुयाः संसदय् थ्यंगु खः । अबले मुक्कं ३२ दँ तिनि दुम्ह वय्कः माओवादीं जनयुद्ध शुरु याःगु इलय् तक उगु पार्टीया केन्द्रीय दुजः तकं मखुनि जब कि अबले पम्फा भुषाल, देव गुरुङ, टोपबहादुर रायमाझी, अग्नी सापकोटा, हरिबोल गजुरेल, मातृका यादवपिं केन्द्रीय दुजः जुइधुंकल ।
तर माओवादी संसदय् दुहां वंगु इलय् वय्कः दलया नेता जुयादिलसा माओवादी सरकारय् वय्कः प्रवक्ता जुयादिल । पार्टी दुने न्ह्याबलें नं अध्यक्ष पुष्पकमल दाहालया जव ल्हाः जुयादीम्ह वय्कःयात पार्टीइ दाहाल धुंकाःया उत्तराधिकारी कथं समेत स्वयेगु शुरु जुइधुंकूगु खः । तर थ्व प्रकरणं वय्कः गथे छक्वलं च्वय् थ्यंगु खः अथे हे छक्वलं क्वय् नं थ्यंगु विश्लेषण याना हःगु दु ।
LEAVE YOUR COMMENTS